काठमाडौं । न्यायपरिषद्ले सात रजिष्ट्रार र उपरजिष्ट्रारलाई जिल्ला न्यायाधीश नियुक्त गरेका छन् । मंगलबार बसेको परिषद्को बैठकले विभिन्न अदालतमा कार्यरत रजिष्ट्रार र उपरजिष्ट्रारसहित सात जिल्ला न्यायाधीशमा सिफारिस गरेको हो । परिषद्को सिफारिसलाई प्रधानन्यायाधीश चोलेन्द्रशमशेर जबराले नियुक्त गर्नेछन् । सर्वोच्च अदालतका पाँच जना उपरजिष्ट्रार जिल्ला न्यायाधीश सिफारिस भएका छन् ।
सर्वोच्च अदालतका उपरजिष्ट्रार विद्याराज पौडेललाई रुकुम र महेन्द्रराज काफ्लेलाई जिल्ला अदालत सोलुखुम्बुमा सिफारिस गरिएको छ । त्यस्तै, सर्वोच्चकै तीन उपरजिष्ट्रार इन्दिरा शर्मा, मनकुमारी जिएम विक र रिताकुमारी बख्रेललाई क्रमशः झापा, बाँके र सप्तरी जिल्ला अदालतमा न्यायाधीश सिफारिस गरिएको परिषद्द्वारा जारी विज्ञप्तिमा भनिएको छ । न्यायाधीश सिफारिस हुनेमा उच्च अदालत दीपायलका रजिष्ट्रार टेकराज जोशी पनि छन् ।
उनलाई डोल्पा जिल्ला अदालतमा न्यायाधीश सिफारिस गरिएको छ । उच्च अदालत तुलसीपुरका रजिष्ट्रार गेहेन्द्रराज पन्त जिल्ला अदालत भोजपुरका लागि सिफारिस भएका छन् । यसैगरी न्यायापरिषद्को बैठकले पाँच न्यायाधीशको सरुवा पनि गरेको छ । जिल्ला अदालत भोजपुरका न्यायाधीश खिलनाथ रेग्मीलाई बारा जिल्ला अदालत, खोलुखुम्बुका न्यायाधीश अमृतबहादुर बस्नेतलाई झापा जिल्ला अदालत सरुवा गरिएको छ ।
त्यस्तै, नवलपुर जिल्ला अदालतबाट अम्बिका प्रसाद निरौलालाई काठमाडौं जिल्ला अदालत ल्याएको छ । दोलखाबाट न्यायाधीश तेजबहादुर खड्कालाई मोरङ र रुकुमबाट आत्मदेव जोशीलाई धादिङ जिल्ला अदालत सरुवा गरिएको परिषद्का प्रवक्ता मानबहादुर कार्कीले जानकारी दिए । सौर्य दैनिकबाट
