काठमाडौं। उपनिर्वाचनका लागि ठूला दललाई उम्मेदवार छान्नै सकस देखिएको छ । जिल्ला तह हुँदै केन्द्रमा सिफारिस भएर आएका उम्मेदवारका नाम धेरै भएपछि दलहरूलाई उम्मेदवारबारे निर्णय लिन सकस हुँदै आएको हो । १४ मंसिरमा प्रतिनिधिसभा, प्रदेशसभा र स्थानीय तहका गरी कुल ५२ पदका लागि उपनिर्वाचन हुँदै छ । सत्तारूढ दल नेपाल कम्युनिस्ट पार्टी ९नेकपा०देखि विपक्षी कांग्रेस हुँदै अन्य साना दलले समेत उपनिर्वाचनका लागि अहिलेसम्म उम्मेदवारबारे निर्णय गर्न सकेका छैनन् ।
खासगरी ठूला दलभित्र उम्मेदवारका लागि आकांक्षी धेरै देखिँदा नाम टुंगो लगाउन सकस पर्दै आएको छ । यसैगरी, एउटा कुनै नाममा तत्कालै निर्णय गर्न समेत असन्तुष्ट पक्षको असहयोग रहने आँकलन गर्दै दलहरूले सकभर मिलाएर र फकाएरै एक जनालाई सर्वसम्मत उम्मेदवार बनाउने कोसिस गरिरहेका छन् । सत्तारूढ दल नेकपाले शनिबार नै उम्मेदवारबारे छलफल गर्न भन्दै सचिवालय बैठक बोलाएको थियो ।
तर, बैठकमा क्षेत्रीय निर्वाचन समन्वय समिति, जिल्ला कमिटी र प्रदेश कमिटीबाट सिफारिस भई आएका नामका विषयमा सामान्य छलफल मात्रै भएको र आइतबार थप छलफल गर्ने गरी सचिवालय बैठक बोलाइएको नेकपाका प्रवक्ता नारायणकाजी श्रेष्ठले जानकारी दिए । ‘शनिबारको बैठकमा सिफारिस भई आएका नामका विषयमा सामान्य छलफल मात्रै भयो, थप विषयमा छलफल गर्ने गरी आइतबार पुनः सचिवालय बस्छ, बैठकले उम्मेदवारबारे निर्णय लिन्छ,’ प्रवक्ता श्रेष्ठले भने ।
नेकपाले उम्मेदवार सिफारिस गर्दा तल्लो तहलाई कम्तीमा तीन जनाको नाम पठाउन भनेको थियो भने कतिपय ठाउँबाट एक जनाको नाम मात्र सिफारिस भएको प्रवक्ता श्रेष्ठले जानकारी दिएका छन् । नेकपा केन्द्रमा कतिपय जिल्लाबाट भने दर्जन बढी आकांक्षीका नाम आएका छन् ।
प्रमुख प्रतिपक्षी दल कांग्रेसले शुक्रबारका लागि उम्मेदवारबारे छलफल गर्न भन्दै केन्द्रीय समिति बैठक डाकेको थियो । सो बैठकले समेत पदाधिकारीलाई नै उम्मेदवारबारे अन्तिम निर्णय गर्ने अधिकार दिएको छ ।
कांग्रेस पदाधिकारी बैठक आइतबार ९आज० नै सभापति शेरबहादुर देउवा निवास बूढानीलकण्ठमा बस्दै छ । कांग्रेस प्रवक्ता विश्वप्रकाश शर्माले आइतबार बस्ने पदाधिकारी बैठकले प्रतिनिधिसभा र प्रदेशसभाका उम्मेदवारबारे अन्तिम टुंगो लगाउने बताए । ‘पदाधिकारी बैठकले नै उम्मेदवार टुंगो लगाउने गरी केन्द्रीय समितिले अधिकार प्रत्यायोजन गरिसकेको छ, आइतबारको पदाधिकारी बैठकले उम्मेदवारबारे अन्तिम टुंगो लगाउँछ,’ कांग्रेस प्रवक्ता शर्माले भने ।
नेकपा र कांग्रेसबाहेक राष्ट्रिय दलका रूपमा मान्यता पाएका समाजवादी पार्टी र राष्ट्रिय जनता पार्टी (राजपा) नेपालले समेत उपनिर्वाचनका लागि उम्मेदवार टुंगो लगाउन सकेका छैनन् । अन्य केही साना दल भने ठूला दलले उम्मेदवार तोकेपछि मात्रै निर्णय गर्ने मनस्थितिमा छन् । खासगरी साना कम्युनिस्ट दलहरू सो रणनीतिमा छन् । समाजवादी पार्टीले भने स्थानीय तहका उम्मेदवारबारे निर्णय गर्न प्रदेशलाई जिम्मेवारी दिइएको बताएको छ । तर, प्रदेश र संघको उम्मेदवारका विषयमा प्रदेशको सिफारिसमा केन्द्रले नै निर्णय गर्ने बताउँदै आएको छ ।
राजपा महासचिव केशव झाले जिल्ला कमिटीसँगको समन्वयमा सम्भावित उम्मेदवारहरूको आन्तरिक मूल्यांकन भइरहेको र छिट्टै निर्णय हुने जनाए । उनले उपनिर्वाचनका लागि निकट शक्तिसँग तालमेल हुने सम्भावनासमेत रहेको जानकारी दिए । राष्ट्रिय प्रजातन्त्र पार्टीले पनि आइतबार ९आजै० उम्मेदवारबारे छलफल गर्न भन्दै कार्यसम्पादन समिति बैठक बोलाएको छ ।
राप्रपा प्रचार विभाग प्रमुख मोहन श्रेष्ठले आइतबारका लागि पार्टीको कार्यसम्पादन समितिको बैठक बोलाइको र बैठकले नै उम्मेदवारबारे निर्णय लिने जानकारी दिए ।
राप्रपाले वडा तहमा उम्मेदवार छनोट गर्ने जिम्मा सम्बन्धित जिल्ला कार्य समितिलाई दिएको छ । गाउँपालिका र नगरपालिकाको उम्मेदवार छनोट भने सम्बन्धित जिल्ला कार्यसमितिको सिफारिसमा प्रदेश कमिटीले गर्ने गरी अधिकार दिइएको छ । प्रतिनिधिसभा र प्रदेशसभाका उम्मेदवारबारे भने राप्रपाले सम्बन्धित जिल्ला समितिले प्रदेश समितिलाई सिफारिस गरेबमोजिम प्रदेश समितिको सिफारिसमा पार्टी केन्द्रबाट टुंगो लगाउन लागेको हो ।
प्रतिनिधिसभामा निर्वाचित तत्कालीन पर्यटनमन्त्री रवीन्द्र अधिकारीको ताप्लेजुङमा हेलिकोप्टर दुर्घटनामा परी निधन भएका कारण कास्कीको प्रतिनिधिसभा निर्वाचन क्षेत्र नम्बर २ खाली छ ।त्यसैगरी, प्रदेशसभातर्फ भक्तपुर १ ‘क’ बाट निर्वाचित हरिशरण लामिछानेको मृत्यु भएपछि सो स्थान रिक्त छ । यस्तै, दाङ ३ ‘ख’ बाट निर्वाचित प्रदेशसभा सदस्य उत्तरकुमार वलीको निधनका कारण सो स्थानसमेत रिक्त छ भने बाग्लुङ २ ‘ख’ बाट निर्वाचित टेकबहादुर घर्तीको निधनका कारण सो स्थान रिक्त छ ।
यस्तै नगरपालिकातर्फ सुनसरीको धरान उपमहानगरपालिका प्रमुख तारा सुब्बाको निधन पछि सो स्थान रिक्त छ । आयोगका अनुसार हाल प्रतिनिधिसभा सदस्य १, प्रदेशसभा सदस्य ३, नगरपालिका प्रमुख १, गाउँपालिका अध्यक्ष ३, उपाध्यक्ष १ र वडा अध्यक्ष ४३ गरी कुल ५२ रिक्त पदका लागि उपनिर्वाचन हुँदै छ । राजधानी दैनिकबाट
