काठमाडौँ: सगरमाथा चढ्नु भनेको शिखरमा पुग्नु हो । साधारण बुझाईमा सगरमाथा चढ्नु भनेको नेपालमा रहेको र यस पृथ्वीको सबैभन्दा अग्लो चुचुरोमा पुग्नु भन्ने अर्थ त हो नै, यसको अर्कोे बिम्ब कुनै पनि काममा सफल हुनु पनि हो । त्यसैले मानिसहरु आआफ्ना, पेशा, व्यवसाय, जागिर या अध्ययन जे सुकैमा पनि सगरमाथा चढ्न चाहन्छन् । त्यसको अर्थ सफल हुनु हो, अर्थात आफ्ना कामका सगरमाथा चढ्नु हो ।
त्यस्तै सफलताको कथा सुनाए अधिवक्त सुधिज्ञ पन्तले । उनी हिमाल आरोही होइनन्, नत पर्यटन व्यवसायी नै । तर, उनी यसअघि केही हिमाल चुचुरा चढे र हालैमात्र विश्वको सबैभन्दा अग्लो हिमाल सगरमाथा नै चढे । उनी कुनै बिम्बात्मक नभएर हिमालकै सगरमाथा चढेका हुन् र, एक अधिवक्ताले विश्वको सबैभन्दा अग्लो हिमाल चढेको सन्देश दिएका हुन् ।
सायद, किन सगरमाथा चढेको भन्ने प्रश्न त उनले आगामी कैयौँ बर्ष सामना गर्नु नै पर्छ होला किनभने उनको पेशा या जागिर कसैका लागि पनि सगरमाथा चढ्नुपर्ने आवश्यकताको माग हुँदैन । तर, यदि कसैको चाहना बढ्छ र त्यो चाहना पूरा गर्न इच्छाशक्तिले पछ्याउँछ भने त्यो पूरा हुन असम्भव छैन । यसैलाई पुष्टि गर्दै उनले सगरमाथा चढेको अनुभव सुनाए र गारो सारो पनि सेयर गरे ।
उनले किन चढे सगरमाथा ? सगरमाथा चढ्दा के कस्तो गाह्रो सारो भयो ? आफूजस्तै अन्य आरोहीका लागि के कस्ता सुझाव छन् ? भोलिका दिनमा सगरमाथा आरोहणको सहजताका लागि सुझाव के छन् ? सगरमाथा हिजोका दिनमा भन्दा आज विश्वको थप आकर्षण कसरी भइरहेको छ ? जीवनमा सगरमाथा चढ्दाको सान र मान के छ ? यो आरोहणलाई विश्वका देशहरुमा के कसरी लिइन्छ ? जलवायु परिवर्तनको असर हिमालमा कस्तो परिरहेको छ ? आदि यस्ता कैयौँ जिज्ञासा, जवाफ र सुझावहरुलाई आफ्नो अनुभवमा सम्हालेर अधिवक्ता पन्तले यसरी सुनाए आफ्नो सगरमाथा आरोहण अनुभव ।
