काठमाडौं । सिंगापुरमा दुइ पटक उपचार गरिसक्नु भएका नेकपाका अध्यक्ष समेत रहनुभएका प्रधानमन्त्री केपी शर्मा ओलीले आफ्नो स्वास्थ्य अवस्था अहिले सामान्य रहेको बताउनुभएकाे छ ।
बुधबार सत्तारुढ नेपाल कम्युनिस्ट पार्टी (नेकपा)को सचिवालय बैठकमा प्रधानमन्त्री ओलीले उपचारपछि आफ्नो अवस्था राम्रो भएको जानकारी दिनु भएकाे थियाे । ‘उहाँले नियमित काम गर्न सक्ने भएको छु भन्नु भएको छ’, सचिवालय बैठकमा सहभागी एक नेताले बताउनुभयाे ।
प्रधानमन्त्रीकाे सिंगापुरस्थित नेसनल युनिभर्सिटीमा रगतमा रहेको एन्टीबडी घटाउन प्लाज्मा फेरेसिस गरिएको थियो । प्रधानमन्त्री ओलीकाे बुधबार बिहान त्रिवि शिक्षण अस्पतालको मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा पुगेर सिंगापुरमा उपचारका क्रममा मुटुमा राखिएको क्याथेटर निकालिएको थियो ।
ती नेताका अनुसार क्याथेटर निकालेका कारण प्रधानमन्त्रीलाई हल्का ज्वरो समेत आएका कारण बैठकमा एउटा मात्र एजेण्डा थियो, उपचुनावका लागि दल दर्ता ।
दल दर्ताको सबै प्रक्रिया पूरा गर्ने जिम्मा पार्टी महासचिव विष्णु पौडेललाई दिइएको नेकपा प्रवक्ता नारायणकाजी श्रेष्ठले बैठकपछि सञ्चारकर्मीहरुलाई जानकारी दिनुभयाे ।
