विप्लवको नियन्त्रणमा सैनिक, दुवै पक्षमा गुपचुप

काठमाडौं । प्रतिबन्धित नेत्रबिक्रम चन्द (विप्लव) नेतृत्वको नेकपाको एक समूहले नेपाली सेनाका जवानलाई अपहरण गरेको छ। अपहरणको उक्त घटना विप्लव र सेना दुबैतर्फबाट एक महिनासम्म चुपचुप राखिएको छ।

रुपन्देहीको सैनामैनास्थित सेनाको श्री नम्बर २ तालिम गणमा तालिमरत सैनिक जवान सुरेन्द्रबहादुर शाहीलाई वैशाख १६ मा विप्लव समूहका कार्यकर्ताले अपहरण गरेका थिए। छुट्टीमा घर गएका शाहीलाई विप्लव समूहले जाजरकोट जुनिचाँदे गाउँपालिका २ स्थित आफ्नै घरबाट अपहरण गरेको हो।

सैनिक जवान शाहीका बुवा वीरबहादुर शाही कांग्रेसका तर्फबाट सोही वडाका अध्यक्ष हुन्। शाही परिवारसँग विप्लव समूहले दुई लाख रुपैयाँ चन्दा मागेको थियो। चन्दा नदिएकै कारण शाहीलाई अपहरण गरिएको हो। सेनाले यो घटनालाई उत्तेजित पार्ने षड्यन्त्र भनेको छ। यो समाचार आजको अन्नपूर्ण पोष्ट दैनिकमा छ ।