काठमाडौँ । नेपाली कांग्रेसका युवा नेता गगन थापाले महामन्त्री शशांक कोइरालाको पछिल्लो अभिव्यक्तिप्रति आपत्ति जनाए । कोइरालाले गणतन्त्र, संघीयता र धर्मका बारेमा जनमत संग्रह गर्नुपर्ने बतापछि उनि कड्किएका हुन् ।
गिरिजाप्रसाद कोइराला फाउण्डेसनले शुक्रबार काठमाडौँमा गरेको कार्यक्रममा नेता थापाले नेताहरुले जथाभावी बोल्दै गए पार्टी भड्खालोमा पर्ने चेतावनी दिएका छन् । उनले पार्टीको जिम्मेवार नेताहरुले पार्टीको छलफलहरुमा केही नराख्ने तर खुला छलफलमा गएर यो विषयमा जनमत संग्रह गरौं, त्यो विषयमा जनमत संग्रह गरौं भन्ने गरेको आरोप लगाए ।
पार्टी भित्र छलफल नगरीकनै जथाभावि बोल्दा पार्टी ठूलो भड्खालोमा जान्छ’ थापाले भने, ‘यो नगरौं । केकेमा डिपार्चर गर्नु पर्ने हो, पार्टीमा छलफल गरौं ।’
कोइरालाले बुधबार होलीका अवसरमा बुधबार आफ्नै निवासमा आयोजित कार्यक्रममा धर्म निरपेक्षता मात्रै होइन, संघीयता र गणतन्त्रबारे जनमत संग्रह गरेर जनताको इच्छा बुझ्न आवश्यक रहेको बताएका थिए त्यसलग्तै कोइरालाले भोलिपल्टै चितवनमा पुगेर बोली फेरेका थिए ।
केन्द्रीय सदस्य थापाले भने, ‘ऐतिहासिक संविधान बनेकोमा गौरब गर्छौं भनेर सुरु गर्ने । तल गएर केके लेख्यौं केके लेख्यौं भन्दा त अस्ती सभापतिले भनेको जस्तो हुन्छ, यो सम्झौताको विरोध गर्छु, पढ्न चाहिँ पढेको छैन । यसो नगरौं ।’
गिरिजाप्रसाद कोइरालाले लिएको सहमति, सहकार्य र एकताको सुत्र पार्टीमा आवश्यक रहेको उनले बताए । तर, सहमति विधानमा टेकेर मात्र खोज्नुपर्ने उनले बताए ।
