लुम्बिनीः राष्ट्रपतिको प्रतिनिधिका रुपमा प्रदेश प्रमुख रहेका व्यक्तिले राजनीतिक भाषण गर्दै हिँड्न मिल्छ कि मिल्दैन ? नेपालको संविधानले सम्भवतः त्यस्तो अख्तियारी प्रदेश प्रमुखहरुलाई दिएको छैन ।
तर पदीय मर्यादाका सीमाहरु नाघ्ने चलन नेपाली राजनीतिक वृत्तमा व्याप्त छ र यस्तो गर्न प्रदेश प्रमुखहरुलाई पनि छुट झैं भइसकेको छ ।
विषय हो, लुम्बिनी बौद्ध विश्वविद्यालयको १७औं स्थापना दिवसका अवसरमा प्रदेश प्रमुख अमिक शेरचनले उठाएको र गरेको प्रश्न । राष्ट्रपति विद्यादेवी भण्डारी मुख्य अतिथि रहनु भएको विशेष समारोहमै राष्ट्रपतिकै प्रतिनिधिका रुपमा रहेका प्रदेश प्रमुख शेरचनले आफ्नो सम्बोधनमा राजनीतिक विषय उठाउनु भयो ।
उहाँ भन्दै हुनुहुन्थ्यो, "नेपालको मिचिएको भूमि लिपुलेक, लिम्पियाधुरा र कालापानी तुरुन्त फिर्ता ल्याउनु पर्छ, त्यो जमिन दिने को थियो त्यो सार्वजनिक गर्नु पर्यो ।"
प्रदेश प्रमुख शेरचनले राजधानीमा राष्ट्रिय प्रजातन्त्र पार्टीको महाधिवेशनमा नेकपा मालेका महासचिव सीपी मैनालीले राजा र राष्ट्रियताका विषयमा बोलेको कुराको प्रतिवाद गर्दै अगाडि भन्नुभयो, "अहिले राष्ट्रियता संकटमा छ, राष्ट्रिय अखण्डता खण्डित गर्ने प्रयास भएको छ ।
विश्वविद्यालयको कार्यक्रममा शेरचनले व्यक्त गरेको त्यस्तो विचार त्यति शोभनीय नरहेको आयोजक समितिका केही पदाधिकारीले बताएका छन् ।
