काठमाडौँ । प्रदेश सभामा मनाङ जिल्लाबाट निर्वाचित भएका दीपक मनाङ्गेले आइतबार प्रदेश सांसद पदको सपथ लिने भएका छन् । मनाङ्गेको सपथको लागि आइतबार गण्डकी प्रदेशको प्रदेशसभा कार्यव्यवस्था परामर्श समितिको बैठक बोलाइएको समाचारमा जनाइएको छ । उनी प्रदेश सांसदमा निर्वाचित भएका थिए । तर ज्यान मार्ने उद्योगमा उनलाई प्रहरी मुद्दा हालेको थियो । सोही कारण उनले सपथ लिन पाएका छैनन् ।
मनाङ्गेको मुद्दा सर्वोच्च अदालतमा विचाराधीन अवस्थामा रहेको छ । तर उनलाई सर्वाेच्चले रिहा गर्ने आदेश दिएको थियो । त्यसैले उनी गतहप्ता मात्र सार्वजनिक भएका हुन् ।
टीकापुर हत्याकाण्डका मुख्य अभियुक्त रेशम चौधरीले सांसद पदको सपथ लिएपछि मनाङ्गेलाई पनि सपथको बाटो खुलेको अनुमान गरिएको थियो । सोही कारण मनाङ्गे आइतबार सपथका लागि पोखरा जाने भएका छन् । उनी अहिले काठमाडौँमै छन् । सपथका लागि भोलि उनी पोखरा जान लागेको उनको पारिवारिक स्रोतले जनाएको छ ।
