काठमाडौं । नेपाली कांग्रेस युवानेता युवराज न्यौपानेले आसन्न १४ औं महाधिवेशनमा केन्द्रीय सभापतिमा उम्मेदवारी दिने घोषणा गरेका छन् ।
काठमाडौंमा आइतबार बिहान पत्रकार भेटघाटको आयोजना गरी गोरखाबाट नेपाली कांग्रेसको १४ औं महाधिवेशन प्रतिनिधिमा निर्वाचित न्यौपानेले कांग्रेसको नेतृत्व परिवर्तनका लागि सभापति पदमा आफूले उम्मेदवारी घोषणा गरेका हुन् ।
न्यौपानेले सभापति शेरबहादुर देउवा र वरिष्ठ नेता रामचन्द्र पौडेललाई आफूले चुनौती दिएको नभएर उनीहरु टेस्टेड भैसकेकाले पद होइन सम्मान दिनुपर्ने लक्ष्यसहित नेतृत्व परिवर्तनका लागि मात्रै आफूले उम्मेदवारी दिने तयारी गरेको बताएका छन् ।
गोरखा आरुघाट गाउँपालिका ८ स्थायी ठेगाना भएका ४० वर्षीय न्यौपाने भिमोदय माध्यमिक विद्यालयबाट स्कुले शिक्षा प्राप्त गरेका थिए । उनले काठमाडौंको त्रिचन्द्र क्याम्पसबाट उच्च शिक्षा हासिल गरेका छन् भने २०५८ देखि २०६० सम्म अध्यापन पेशामासमेत आबद्ध भएका थिए ।
उनले जनसम्पर्क समिति चीनको संस्थापक महामन्त्री (२०७३), नेविसंघ ल क्याम्पसको एकाइ सचिव, २०५७ मा गाउँ कमिटी सचिव रहेर काम गरिसकेका छन् ।
कांग्रेसको १४ औं महाधिवेशन मंसिर २४ देखि २६ गतेसम्म हुँदैछ । सभापतिमा शेरबहादुर देउवा, वरिष्ठ नेता रामचन्द्र पौडेल, उपसभापति विमलेन्द्र निधि, महामन्त्री शशांक कोइराला, पूर्वमहामन्त्री प्रकाशमान सिंह, केन्द्रीय सदस्य शेखर कोइराला, सुजाता कोइराला, कल्याण गुरुङ लगायत नेताले उम्मेदवारी घोषणा गरेका छन् ।
