नेपालगञ्ज । बाँकेको राप्तीपारी विकट क्षेत्र बघौडामा पर्ने नरैनापुर गाउँपालिकालाई पूर्ण साक्षर तथा सरसफाइयुक्त बनाउन त्यहाँका प्रबुद्ध वर्ग लागिपरेका छन् । गाउँपालिकाले अघि सारेको पूर्ण साक्षर तथा सरसफाइ अभियानमा अहिले गाउँपालिकाका सबै वडाका जनप्रतिनिधि, शिक्षक, विद्यार्थी, नागरिक समाजका अगुवालगायत सर्वसाधारण समेत एक भएका छन् ।
बाँके जिल्लाको दुई नगरपालिकासहित कूल आठ स्थानीय तहमध्ये भौतिक तथा मानवीय विकासमा सबैभन्दा पछाडि परेको सो गाउँपालिकालाई विकासको मूल प्रवाहमा जोडनु पर्नेमा सबै एकमत पनि भएका छन् । ‘‘सबैको सहयोगमा आगामी चैतसम्म यो अभियान सञ्चालन गर्छौं’’, गाउँपालिका अध्यक्ष इस्तियाक अहमद शाहले भन्नुभयो ।
नरैनापुरमा बिजुली बत्ती छैन, सरकारी कार्यालय छैनन, बाँकेको सदरमुकाम पुग्न बाटोको सहजता नभएकाले सीमापारी भारतीय बजारमा किनमेल गर्न जानुपर्दछ ।
गाउँपालिका क्षेत्रमा आगलागी भयो भने नेपालगञ्जबाट दमकल पुग्न नसक्ने अवस्थालाई दृष्ट्रिगत गरी दमकल खरीद गरिएको छ । हुलाकी राजमार्गले नरैनापुरलाई जोड्दै छ । नेपालगञ्जदेखि नरैनापुरको सूइयाल बघौडासम्मको ४४ दशमलब ६ किलोमिटर हुलाकी सडक कालोपत्र हुन थालेको छ ।
गाउँपालिका अध्यक्ष शाहले शिक्षा नै विकासको मूल आधार भएकाले नरैनापुरको शैक्षिक विकासका लागि आफू दत्तचित्त भएर लागिपरेको बताउनुभयो । अब एकजना पनि ‘आंैठाछाप’ नरहने मूल उद्देश्य र लक्ष्यका साथ गाउँपालिकाले पछिल्लो पटक शुरु गरेको पूर्ण साक्षर र सरसफाइ अभियानमा बाँके जिल्ला शिक्षा समन्वय एकाइ, शिक्षासँग सम्बन्धित विभिन्न गैरसरकारी संस्थाले पनि सघाएका छन् ।
प्रमुख प्रशासकीय अधिकृत दलबहादुर बस्नेतका अनुसार गाउँपालिकामा १२ हजार नागरिक निरक्षर छन् । अभियानले उनीहरु सबैलाई समेटेको छ । विशेषत : विद्यालय जाने उमेरका बालबालिकादेखि प्रौढ र वृद्धवृद्धालाई अभियानअन्तर्गत साक्षर बनाइने छ । रासस
