काठमाडौं । नेकपा एमालेकी नेतृ भगवती न्यौपानेले नेकपा एमालेको केन्द्रीय सदस्यको उम्मेदवारी दिनुहुने भएको छ ।
राष्ट्रिय सभा सदस्य समेत रहनुभएकी नेतृ न्यौपानेले पार्टीको आसन्न दशौं महाधिवेशनमा महिला कोटाबाट केन्द्रीय सदस्यमा उठ्नुहुने घोषणा गर्नुभएको हो ।
वि।सं। २०५१ सालमा नेकपा एमालेको सदस्यता प्राप्त गर्नुभएको न्यौपाने २०५६ सालबाट निरन्तर नेकपा एमालेको जिल्ला कमिटीमा विभिन्न पदको जिम्मेवारीमा रहँदै आउनुभएको छ ।
उहाँ हाल एमाले तनहुँका सचिव तथा अखिल नेपाल महिला संघको केन्द्रीय सदस्य र तनहुँ जिल्ला इन्चार्ज हुनुहुन्छ । विद्यार्थी आन्दोलनबाट उदाउँदै अनेरास्ववियुको राष्ट्रिय परिषद सदस्य बन्नुभएका उहाँले अनेमसंघ तनहुँको दुई कार्यकालसम्म अध्यक्षको रुपमा काम गर्नुभयो । उहाँसँग ९ वर्षसम्म नेकपा एमाले तनहुँको सचिवको रुपमा काम गरेको अनुभव समेत छ ।
न्यौपाने २०६२ ⁄ ६३ जनआन्दोलनको चर्चित पात्रसमेत हुनुहुन्छ । पार्टी अध्यक्ष केपी शर्मा ओलीको विश्वासपात्रको रुपमा रहनुभएकी उहाँलाई केन्द्रीय सदस्य बनाई भुगोलको राजनीतिमा पठाउने विषयमा अध्यक्ष ओली सकरात्मक रहनुभएको बुझिएको छ ।
तनहुँ क्षेत्र नं १ मा नेकपा एमालेबाट निर्वाचित सांसद कृष्णकुमार श्रेष्ठ नेकपा एकीकृत समाजवादीमा लागेपछि र एमालेमा लामो समयसम्म पृष्ठभुमी बनाएका नेताहरु प्रतापलाल श्रेष्ठ, शंकरनारायण श्रेष्ठ, विद्या ढकाल लगायत नेताहरु नेकपा एसमा लागेर कार्यकर्ताहरुलाई आफूतिर तानातान गरिरहेको अवस्थामा नेतृ न्यौपानेले ती कार्यकर्तालाई जोगाउने मात्र नभई पार्टीको पक्षमा दृढताका साथ उभिन नेतृत्वदायी भूमिका खेलेर उहाँ थप चर्चित हुनुभयो । उहाँले राष्ट्रिय सभामा सांसदको रुपमा रहेर पनि सशक्त आवाज उठाउँदै आउनुभएको छ । उहाँले आम जनताको आवाज बनेर राष्ट्रिय सभामा सम्बोधन गर्दै आउनुभएको छ ।
हाल तनहुँ क्षेत्र नम्बर १ मा उहाँ एमालेका कार्यकर्ताको आशा र भरोसाको एकमात्र नेता हुनुहुन्छ । उहाँ पार्टीको केन्द्रीय सदस्यमा निर्वाचित भएमा तनहुँमा कार्यकर्ताको संरक्षण गर्ने र विपक्षीसँग पनि बैचारिक बहसले अडिग रहँदै केन्द्रबाट समेत भरोसा गर्नसक्ने सशक्त नेता पाउने आशामा कार्यकर्ताहरु रहेका छन् । एमालेले यस दशौं महाधिवेशनमा ३३ प्रतिशत महिला केन्द्रीय सदस्य ग्यारेन्टी गरेको हुँदा न्यौपाने केन्द्रीय सदस्य बन्नेमा ढुक्क हुनुहुन्छ ।
एमालेको आसन्न महाविधेशन यही मङ्सिर १० देखि १२ गतेसम्म चितवनमा हुँदैछ । महाधिवेशनको मङ्सिर १० गते नारायणी नदी किनारमा उद्घाटन हुनेछ भने ११ र १२ गते सौराहाको सेभेन स्टारमा बन्दसत्र हुनेछ ।
महाधिवेशनमा देशभरिबाट एक हजार ९९९ प्रतिनिधि चयन भइसकेका छन् भने पाँच प्रतिशतसम्म मनोनीत सदस्य हुनेछन् । महाधिवेशनमा एमालेले पाँच लाख जनता सहभागी गराउने बताउँदै आएको छ ।
महाधिवेशनले १५ केन्द्रीय पदाधिकारीसहित २२५ केन्द्रीय कमिटी सदस्य र लेखा आयोग तथा अनुशासन आयोगमा १५/१५ जना निर्वाचित गर्नेछ ।
