काठमाडौं । आईसीसी महिला टी २० विश्वकपको एसिया छनोटमा नेपालले आफ्नो पहिलो खेलमै हार ब्यहोरेको छ ।
दुबईस्थित आईसीसी एकेडेमी मैदानमा सम्पन्न खेलमा नेपाल हङकङसँग ६ विकेटले पराजित भएको हो।
टस हारेर ब्याटिङमा उत्रिएको नेपालले निर्धारित २० ओभरमा ३ विकेट गुमाउँदै १०४ रन बनाएको थियो । जवाफी ब्याटिङमा उत्रिएको हङकङले ४ विकेट गुमाएर १९ औं ओभरको समाप्तिमा लक्ष्य भेट्टायो ।
सुरुवाती ब्याटिङमा उत्रिएको नेपालका लागि ओपनर सिता राना मगरले ५८ बलमा अविजित ४० रनको योगदान दिइन् । उनले चार चौका प्रहार गरिन् । त्यस्तै, इन्दु वर्माले ३१ रन बनाइन्।
बलिङतर्फ हङकङका बेट्टी चान र केरी चानले समान १–१ विकेट लिए ।
हङकङका लागि ओपनर मारिको हिलले सर्वाधिक ४४ रन बनाउँदा केरी चेनले १७ रन बनाइन् । त्यस्तै नतासा माइल्सले १६ रन बनाउँदा इम्मा लाइले अविजित १३ रन बनाइन्।
नेपालको तर्फबाट कविता कुवँर, सीता मगर र सबनम राईले समान १र१ विकेट लिए।
