लमजुङ । लमजुङको सदरमुकाम बेँसीसहर नगरपालिकामा नेकपा (एमाले) का उम्मेदवार गुमानसिंह अर्याल विजयी भएका छन् । निवर्तमान प्रमुखसमेत रहेका अर्याल नौ हजार ४७९ मत ल्याई निर्वाचित बनेका हुन् ।
उनका निकटतम प्रतिद्वन्द्वी सत्ता गठबन्धनबाट नेपाली कांग्रेसका उम्मेदवार श्रीकान्त घिमिरेले सात हजार ४७१ मत हासिल गरेका छन् । अघिल्लो पटकको स्थानीय तहको निर्वाचनमा एमालेले (माओवादी केन्द्र) सँग चुनावी तालमेल गरेर उम्मेदवारी दिएका अर्यालले कांग्रेसका तत्कालीन जिल्ला सभापति भेषबहादुर पौडेललाई २९७ मतान्तारले हराएका थिए ।
त्यसैगरी नगर उपप्रमुखमा एमालेकै पद्मा गुरुङ निर्वाचित भएकी छन् । शिक्षक पेशा त्योगेर उम्मेदवारी दिएकी पद्मा आठ हजार ७१४ मत प्राप्त गर्दा उनका निकटतम प्रतिद्वन्द्वी सत्ता गठबन्धनबाट माओवादी केन्द्रका हरिजंग तामाङले चार हजार ६९९ मत प्राप्त गरे ।
प्रमुखका लागि अन्य उम्मेदवारमा राप्रपाका अजितबहादुर अधिकारीले १४६, मंगोल नेसनल अर्गनाइजेशनका कुलुकुमारी गुरुङले ५३ र जसपाका बलबहादुर रानाले ४३ मत प्राप्त गरे ।
सत्ता गठबन्धनबाट बागी उम्मेदवारी दिएका कांग्रेसका जीवनकुमार श्रेष्ठले उपप्रमुखमा एक हजार ६१५ मत पाएका छन् । त्यस्तै उपप्रमुखमा राप्रपाका मेनुका कार्कीले १४८ र मंगोल नेसनल अर्गनाइजेशनका पदममाया गुरुङले ४८ मत ल्याए ।
एघार वडा रहेको बेँसीसहर नगरपालिकामा वडा नं १, २, ५, ७, ८, १० र ११ मा नेकपा एमालेका उम्मेदवार वडाध्यक्षमा निर्वाचित भए भने एमालेबाटै बागी उम्मेदवारी दिएका स्वतन्त्र उम्मेदवार प्रकाश थापा वडा नं ६ को वडाध्यक्षमा निर्वाचित भए ।
सत्ता गठबन्धनबाट कांग्रेसका तर्फबाट वडा नं ४ र ९ तथा माओवादी केन्द्रबाट वडा नं ३ मा वडाध्यक्ष निर्वाचित भएका छन् ।
