सुर्खेतः स्थानीय निकायको चुनाव नजिकिँदै गर्दा देशभर नै पार्टी परित्याग गर्ने र कारबाही गर्ने सिलसिला निकै तिब्र गतिमा अघि बढेको छ । पछिल्लो समय खासगरी नेकपा एमाले, नेपाली काँग्रेस र नेकपा (माओवादी केन्द्र) बीच होडबाजी नै चलेको छ ।
यसै सिलसिलामा कर्णाली प्रदेशमा नेकपा (माओवादी केन्द्र) का एक प्रदेश सांसद नेकपा एमालेमा प्रवेश गर्ने भएपछि हल्लीखल्ली मच्चिएको छ ।
पछिल्लो विवरण अनुसार नेकपा माओवादीका तर्फबाट कर्णाली प्रदेशका सांसद ठम्मर विष्टले आफू नेकपा एमालेमा प्रवेश गर्ने तयारी गर्नु भएको छ । यो समाचार सार्वजनिक भए लगत्तै नेकपा माओवादी संसदीय दल कर्णाली प्रदेशको बैठकले सांसद विष्टलाई निष्कासन गरेको छ ।
दलका नेता महेन्द्रबहादुर शाहीद्वारा हस्ताक्षरित विज्ञप्तीमा सांसद विष्टले निरन्तर दलको विधान विपरितका अभिव्यक्ति र गतिविधि गर्दै आइरहेको बताउँदै विष्टलाई निष्कासन गर्नु परेको उल्लेख गर्नु भएको छ ।
विज्ञप्तीमा भनिएको छ, “विष्टले प्रदेश सभा सदस्यबाट राजीनामा समेत पेश गरेको सन्दर्भमा यही चैत्र ३ गते प्रदेश सभा दलको बैठक सम्पन्न भयो । उक्त बैठकले राजीनामा फिर्ता लिएर नियमित कार्यमा क्रियाशील हुन उहाँलाई दिएको निर्देशनको अवज्ञा गरेकाले दलको सदस्यबाट निलम्बन गरिएको सुचित गरिन्छ ।’
श्री विष्ट आज नेकपा एमाले प्रवेश गर्ने तयारी गर्नु भएको छ । वीरेन्द्रनगरमा आयोजना गरिएको पार्टी प्रवेश कार्यक्रममा पार्टीका वरिष्ठ उपाध्यक्ष ईश्वर पोख्रेलले विष्टलाई स्वागत गर्ने कार्यक्रम तय भएको नेकपा एमाले कर्णालीले जनाएको छ ।
विष्टसहित थप केही जिल्ला कमिटिका सदस्यहरु समेत एमालेमा प्रवेश गराउने तयारी भइरहेको एमालेका नेताहरुको भनाई छ ।
प्रमुख सचेतक रहेकै समयमा विष्टले गत फागुन २७ गते पार्टीबाटै राजीनामा दिएको घोषणा गर्नु भएको थियो ।
