काठमाडौँ । काठमाडौँ महानगरपालिकाको जारी मतगणना अहिले कोर एरियामा भइरहेको छ । अहिले नेवारहरुको बाक्लो बस्ती रहेको वडा नं ११, १२, २३, २४, २५, २६ र २७ को मतपेटिकाका मतगणना भइरहेको छ ।
काठमाडौँ महानगरको प्रमुख पदका लागि सत्ता गठबन्धनबाट नेपाली कांग्रेस उम्मेदवार सिर्जना सिंह र नेकपा (एमाले) का केशव स्थापितलाई यी क्षेत्रबाट बढी मत आउने अपेक्षा गरिएको थियो ।
यद्यपि यसअघि नै मतगणनामा करिब १७ हजार मतान्तरले अगाडि रहेका स्वतन्त्र उम्मेदार बालेन साहभन्दा नेवार समुदायबाट आफूहरुलाई बढी मत आउने अपेक्षा गरेका सिंह र स्थापितलाई सोचेजति मत आउन सकेको छैन ।
सिंह र स्थापितलाई यी क्षेत्रबाट बढी मत आए पनि तेस्रो स्थानमा मत ल्याएका साह यी दुई उम्मेदवारभन्दा थोरै मात्र मतले पछि छन् ।
यी वडामा अहिलेसम्म जम्मा १९ हजार २०१ मत गणना भइसकेको छ । सोमध्ये सबैभन्दा धेरै मत एमालेका स्थापितले ल्याएका छन् । उनले चार हजार ४२५ मत ल्याएका छन् । दोस्रो बढी मत ल्याउने कांग्रेसकी सिंहले चार हजार ४१२ मत ल्याएकी छन् । त्यस्तै साहले यी क्षेत्रबाट चार हजार १५१ मत हासिल गरिसकेका छन् ।
समग्रमा हेर्दा बालेल साह नै अहिलेसम्म अग्रस्थानमा छन् भने सिंहले स्थापितलाई उछिनिसकेकी छन् । बाहिरी क्षेत्रमा बालेनले धेरै मतले अग्रता गरेकाले कोर एरियामा केही मतले पछि परे पनि उनलाई खासै असर नपर्ने देखिएको छ ।
कोर एरियामा पनि आठ वटा वडामा स्थापितले अग्रता हासिल गरिरहेका छन् भने सिंहले दुईवटा र साहले एउटा वडामा अग्रता बनाइरहेका छन् ।
अहिलेसम्मको मतगणनमा साहले ३९ हजार ५१५ मत ल्याई आफ्नो अग्रतालाई कायमै राखेका छन् । दोस्रो स्थानमा रहेकी सिंहले २२ हजार २७० मत पाएकी छन् भने त्यसपछि स्थापितले २१ हजार ७७५ मत हासिल गरेका छन् ।
