काठमाडौं । काठमाडौं महानगरपालिका वडा नम्बर १५ का अध्यक्ष ईश्वरमान डंगोलले फोहोर व्यवस्थापन नहुन्जेल आफूले बैठक भत्ता नलिने बताएका छन् ।
काठमाडौंका नवनिर्वाचित मेयर बालेन शाहले आज राखेको नगर कार्यपालिका बैठकमा बोल्दै वडाध्यक्ष डंगोलले बैठक भत्ता नलिने घोषणा गरेका हुन् ।
‘फोहोर व्यवस्थापन नभइरहेको अवस्थामा यो बैठकको भत्ता म लिन्नँ, यो नोट गर्नुहोला । फोहोर व्यवस्थापन नभएको कारण म बैठक भत्ता लिन्नँ । पछि बैंक खातामा भत्ता भनेर नपठाउनुहोला । म अहिले नै जानकारी गराउँछु ।’
उनी वडा नम्बर १५ मा तेस्रोपटक अध्यक्ष निर्वाचित भएका हुन् । उनी नेकपा एकीकृत समाजवादीबाट उम्मेदवार भई वडाध्यक्ष बनेका थिए ।
