एजेन्सी । आर्थिक संकट झेलिरहेका श्रीलंकाका राष्ट्रपति गोटाबाया राजापाक्षे देश छोडेर भागेका छन् ।
१३९ दिनको विरोधपछि राजापाक्षेले राजीनामा दिएका छन् । उनको राजीनामाको घोषणा आज संसदमा हुने र त्यससँगै अन्तरिम राष्ट्रपतिको नाम पनि घोषणा गरिने छ ।
विभिन्न सञ्चारमाध्यमले उनी माल्दिभ्स भागेको बताइएको भएपनि यसको आधिकारीक पुष्टि भने हुन सकेको छैन । माल्दिभ्समा अवतरणको अनुमति नहुँदा अन्योलमा परेपछि विमान एक घण्टाभन्दा बढी टार्माकमा रोकिएको विमानस्थलका अधिकारीहरूले बताएका छन् ।
गोटाबाया जुलाई ८ देखि कोलम्बोमा देखिएका थिएनन् । मङ्गलबार अर्थात् जुलाई १२ मा उनी नौसेनाको जहाजबाट भाग्न खोजिरहेका थिए, तर बन्दरगाहका अध्यागमन अधिकारीहरूले उनलाई रोकेका थिए ।
राजापाक्षेले देशभरि जारी विरोध प्रदर्शनका कारण आफूले अन्य सार्वजनिक सुविधाहरू प्रयोग गर्न नसक्ने जिद्दी गरे तर अधिकारीहरूले मानेनन् ।
गोटाबाया राजापाक्षेले राजीनामा दिनुअघि आफूलाई देश छाड्न दिनु पर्ने शर्त राखेका थिए । त्यसको केही घण्टापछि नै उनको देश छाडेको खबर बाहिरियो । यस्तो अवस्थामा अब गोटाबाया भागे कि भगाइए ? भन्ने प्रश्न उठ्छ । राजापाक्षेले १२ जुलाईमा आफ्नो राजीनामामा हस्ताक्षर गरी वरिष्ठ अधिकारीलाई बुझाएका थिए । उक्त पत्र बुधबार संसदका सभामुख महिन्दा यापा अभयवर्धनेलाई हस्तान्तरण गर्ने कार्यक्रम थियो । गोटाबाया राजपाक्षे श्रीलंका छोडेर अमेरिका भाग्न चाहन्थे तर अमेरिकाले उनलाई भिसा दिएन ।
