दुबईमा बिहीबार साँझ भएको एसिया कप टी–२० क्रिकेट प्रतियोगितामा श्रीलंकाले बंगलादेशलाई दुई विकेटले पराजित गरेको छ ।
बंगलादेशले प्रस्तुत गरेको १८४ रनको लक्ष श्रीलंकाले चार बल बाँकी रहेको अवस्थामा आठ खेलाडी गुमाएर पूरा गरेको थियो । श्रीलंकाका लागि कुसल मेन्डिसले ६० र डासुन सानाकाले ४५ रनको आकर्षक पालि खेलेका थिए ।
यो जितसँगै श्रीलंका सुपर चारमा छनौट भएको छ ।
यस अघि टस हारेर ब्याटिङको निम्तो पाएको बंगलादेशले सात विकेट गुमाएर १८३ रन बनाएको थियो । बंगलादेशका लागि मेहदी हसन मिराजले ३८, अफिफ हुसेनले ३९, महमुलाहले २७ रन बनाएका थिए ।
तर बंगलादेशका बलरहरुले अतिरिक्त रन धेरै दिएपछि श्रीलंकाले निर्धारित लक्ष सहजै पूरा गरेको थियो । बंगलादेशी खेलाडीले चार वटा नो–बल र ८ वटा वाइड फालेका थिए ।
समूह ख मा अफगानिस्तान, बंगलादेश र श्रीलंका रहेका छन् । बंगलादेशले लगातार २ खेल हारेर अंक तालिकामा पुछारमा छ भने अफगानिस्तानले ४ र श्रीलंकाले २ अंक बटुलेको छ ।
समूह क मा भने भारत, पाकिस्तान र हङकङ रहेका छन् ।
भोलि हङकङ र पाकिस्तान बीच खेल हुनेछ । यस समूहमा भारतले ४ अंक बटुलेको छ भने हङकङ र पाकिस्तानले अंक पाएका छैनन् ।
एजेन्सी
