काठमाडौँ : नेपाल स्टक एक्सचेञ्ज (नेप्से) सञ्चालक समितिको बैठकले आउँदो असोजदेखि शुक्रबार सेयर कारोबार बन्द गर्ने निर्णय गरेको छ ।
शुक्रबार सेयर कारोबार नगर्ने सम्बन्धमा आइतबार बसेको समितिको बैठकले यस्तो निर्णय गरेको हो । लगानीकर्ताको माग, नियामक निकायको सुझाव र नेप्सेको कारोबार प्रणालीको मर्मतसम्भार गर्नुपर्ने भएकाले शुक्रबार सेयर कारोबार बन्द गर्ने निर्णय भएको नेप्सेले जनाएको छ ।
असोजदेखि पुरानो व्यवस्था अनुसार नै सातामा ५ दिन (आइतबार देखि बिहीबारसम्म) मात्र सेयर कारोबार गर्ने निष्कर्षमा नेप्से पुगेको हो ।
सरकारले शनिबार र आइतबार दुई दिन सार्वजनिक बिदा गरेपछि गत जेठदेखि नेप्सेले पनि आइतबारको सेयर कारोबार बन्द गरेर शुक्रबार खोलेको थियो । पछि सरकारले आइतबारको बिदा खारेज गर्यो । तर सेयर कारोबार भने शुक्रबार पनि भइरहेको थियो ।
झण्डै तीन हजार नाघेको सेयर बजार निरन्तर ओरालो लागेको अवस्थामा सेयर लगानीकर्ताको चर्को दबाबका बीच शुक्रबारको सेयर कारोबार बन्द गरिएको स्रोतले बताएको छ ।
हाल सातामा ६ दिन (आइतबार देखि शुक्रबारसम्म) सेयर कारोबार हुँदै आएको छ ।
