काठमाडौँ । पर्यटनमन्त्री जीवनराम श्रेष्ठलाई लाइनमा मिलाउँदा ‘दुर्व्यवहार’ गरेका सुरक्षा गार्ड शेरजंग गुरुङ अहिले प्रहरी हिरासतमा छन् ।
ठमेलस्थित छायासेन्टरमा रहेको भिएफएसका सुरक्षा गार्ड गुरुङलाई प्रहरीले हिरासतमा राखेको हो । मन्त्रीलाई लाइनमा बस्नुस् भनेकै आधारमा उनलाई प्रहरीले पक्राउ गरेको थियो ।
प्रहरीले गुरूङलाई हिरासतमा राखेर अनुसन्धान गर्न जिल्ला प्रशासन कार्यालयबाट पाँच दिनको म्याद लिएको छ।
सुरक्षा गार्ड गुरुङले आफ्नो आवाज ठूलो हुनसक्ने भए पनि मन्त्रीलाई कुनै दुर्व्यवहार नगरेको बताएका छन् । आफ्नो ड्युटी पूरा गर्दा उनलाई पक्राउ गर्नु गलत भएको भन्दै अहिले चौतर्फी आलोचनासमेत भइरहेको छ ।
गुरुङले काम गर्ने गरुड सेक्युरिटिजले आफ्नो सुरक्षा गार्डले कुनै गल्ती नगरेको दाबी गरेको छ । उसले सो घटनाको सिसिटिभी फुटेज देखाउनसमेत माग गरेको छ ।
गुरूङले काम गर्ने गरूड सेक्युरिटिजले भने उनले कुनै गल्ती नगरेको दाबी गर्दै घटनाको सिसिटिभी फुटेज देखाउन माग गरेको छ। दिइएको निर्देशनअनुसार गुरुङले जिम्मेबारी पूरा गरेकाले माफी माग्नु पर्ने कुनै कारण नरहेको सेक्युरिटिजले बताएको छ ।
मन्त्री श्रेष्ठले अप्रत्यक्षरुपमा गरुड सेक्युरिटिजले सार्वजनिकरुपमा माफी माग्नुपर्ने दबाब दिएको बताइएको छ । साथै आफ्ना गार्डलाई हिरासतमा राखेपछि सेक्युरिटिजले बन्दीप्रत्यक्षीकरणको मुद्दा पनि हाल्ने तयारी गरिरहेको बताइएको छ । प्रमाणका लागि उसले भिएसएफसँग सिसिटिभी फुटेजको माग गरेको हो ।
सेक्युरिटिजका एक कर्मचारीले आफूले सिसिटिभी फुटेज हेरेर नै गार्डले कुनै गल्ती नगरेको स्पष्ट पारेका छन् । बन्दी प्रत्यक्षीकरणको मुद्दा हाल्न सो फुटेज आवश्यक भएकाले भिएसएफसँग माग गरेको उनले बताए । फुटेजमा मन्त्री नै बढी एग्रेसिभ भएको देखिएको उनले बताए ।
