काठमाडौं । कतारमा जारी फिफा विश्वकप फुटबल अन्तर्गत आज मंगलबारबाट सेमिफाइनल खेलहरु सुरु हुँदैछ ।
जसअनुसार पहिलो सेमिफाइनलमा आज राति अर्जेन्टिना र क्रोएसियाले प्रतिस्पर्धा गर्दैछन् । अर्जेन्टिना र क्रोएसियाबीचको खेल दोहाको लुसेल रंगशालामा राति ००ः४५ बजे सुरु हुनेछ ।
दुबै टिमको प्रमुख लक्ष्य जित निकाल्दै फाइनलमा पुग्नु हुनेछ । अर्जेन्टिना लियोनल मेसीको कप्तानीमा मैदानमा उत्रँदा क्रोएसियाको कप्तानी लुका मोड्रिचले गर्नेछन् ।
यसअघि क्वाटरफाइनलमा अर्जेन्टिनाले नेदरल्याण्ड्सलाई तथा क्रोएसियाले ब्राजिललाई हराउँदै अन्तिम चारमा स्थान बनाएका हुन् । दुबै टिमले टाइब्रेकरमा जित निकाल्दै सेमिफाइनलमा स्थान बनाएका हुन् ।
दुई पटक विश्व च्याम्पियन बनिसकेको अर्जेन्टिना क्रोएसियालाई हराएर छैटौं पटक विश्वकपको फाइनल पुग्ने योजनामा रहेको छ ।साविक उपविजेता क्रोएसिया दोस्रो पटक विश्वकपको फाइनल खेल्न चाहन्छ । क्रोएसिया पहिलोपटक विश्वकप उपाधि जित्ने दाउमा रहेको छ ।
अर्जेन्टिना र क्रोएसियाबीच पछिल्लो पटक २०१८ को विश्वकपमा प्रतिस्पर्धा भएको थियो । समूह चरणको भेटमा क्रोएसियाले अर्जेन्टिनालाई ३–० ले पराजित गरेको थियो । हालसम्म यी दुई टोली ५ पटक आमनेसामने भएका छन् । जसमा दुबैले दुई–दुई खेल जित्दा एक खेल बराबरीमा सकिएको छ ।
