काठमाडौँ । अर्जेन्टिना कतारमा जारी फिफा विश्वकपको फाइनलमा प्रवेश गरेको छ । सेमिफाइनल अन्तर्गत भर्खरै सम्पन्न खेलमा क्रोएसियालाई ३-० गोलले पराजित गर्दै अर्जेन्टिना उपाधि नजिक पुगेको हो ।
अर्जेन्टिनालाई जित दिलाउन युलियन अल्भारेजले दुई तथा लियोनल मेसीले एक गोल गरे ।
खेलको ३४ औं मिनेटमा मेसीले पेनाल्टीमार्फत गोल गर्दै अर्जेन्टिनालाई सुरुवाती अग्रता दिलाए । त्यसको पाँच मिनेटपछि अर्थात् ३९ औं मिनेटमा अल्भारेजले गोल गर्दै अर्जेन्टिनाको अग्रता दोब्बर पारे । उनले सेन्टरबाट एक्लै बल लगेर गोल गर्न सफल भए ।
६९ औं मिनेटमा अल्भारेजले व्यक्तिगत दोस्रो तथा टिमका लागि तेस्रो गोल गरे । उनलाई मेसीले पास उपलब्ध गराए । अब अर्जेन्टिनाले उपाधिका लागि भोलि हुने फ्रान्स र मोरक्कोबीचको विजेतासँग प्रतिस्पर्धा गर्नेछ । फाइनल खेल आइतबार हुनेछ ।
यसैबीच, मेसीले विश्वकपमा सर्वाधिक खेल खेल्ने जर्मनीका लोथार माथेसको कीर्तिमानलाई बराबरी गरेका छन् । विश्वकपमा सबैभन्दा बढी खेल खेल्ने कीर्तिमान माथेसको नाममा थियो । उनले विश्वकपमा २५ खेल खेलेका थिए । क्रोएसियाविरुद्ध मैदानमा उत्रिदै मेसीले यो कीर्तिमानको बराबरी गरेका हुन् ।
