एजेन्सी । स्पेनिस फुटबल लिग ला लिगा अन्तर्गत रियल मड्रिडले जित निकालेको छ । गएराति भएको खेलमा रियलले भ्यालेन्सियालाई २–० गोलले पराजित गरेको हो ।
घरेलु मैदान सान्टियागो बर्नबेउमा रियललाई जित दिलाउन मार्को एसेन्सिओ र भिनिसियस जुनियरले एक–एक गोल गरे । दुवै गोल दोस्रो हाफमा भएको थियो ।
५२औं मिनेटमा एसेन्सिओले सानदार गोल गर्दै रियललाई सुरुवाती अग्रता दिलाए । बेन्जेमाले दिएको पासलाई एसेन्सिओले पेनाल्टी बक्सबाहिरबाट गोलमा परिणत गरे ।
लगत्तै त्यसको दुई मिनेटपछि भिनिसियसले गोल गर्दै रियलको अग्रता दोब्बर पारे । कप्तान बेन्जेमाकै पासमा भिनियसले गोलरक्षकलाई बिट गर्दै गोल गर्न सफल भएका थिए ।
७२औं मिनेटमा भ्यालेन्सिया १० खेलाडीमा समेटिन पुग्यो । भिनिसियस जुनियरमाथि फउल गरेपछि रेफ्रीले गाब्रिएल पाउलिस्टालाई सिधै रातो कार्ड देखाउँदै मैदान बाहिर पठाए ।
जितसँगै रियलले शीर्षस्थानमा बार्सिलोनासँगको अंक दुरी ५ मा छोट्याएको छ । दोस्रो स्थानमा रहेको रियलको १९ खेलबाट ४५ अंक पुगेको छ । समान खेलबाटै बार्सिलोनाको ५० अंक छ । पराजित भ्यालेन्सिया भने २० अंकसहित १४औं स्थानमा छ ।
