एजेन्सी । युरो २०२० फुटबलको पहिलो सेमिफाइनल खेलमा आज (मंगलबार) राति प्रतिक्षित खेल हुँदैछ ।
इंग्ल्यान्डको वेम्बली स्टेडियममा हुने पहिलो सेमिफाइनलमा दुई दाबेदार राष्ट्र इटाली र स्पेन भिड्दैछन् । दुई टीमबीचको खेल राति १२ः४५ बजे सुरु हुनेछ ।
दुबै टिम जित निकाल्दै फाइनल पुग्ने लक्ष्यसहित मैदानमा उत्रनेछन् ।
पछिल्लो समय युरोपको सबैभन्दा उत्कृष्ट फर्ममा भएको इटालीले कीर्तिमानी ३२ खेलमा अपराजित यात्रा तय गरिसकेको छ भने पछिल्ला १३ खेलमा इटालीले शत प्रतिशत नतिजा निकालेको छ । अर्कातर्फ पछिल्ला १२ खेलमा अपराजित स्पेनले समूह चरणको दुई खेल भने बराबरी खेलेको थियो ।
इटालीले क्वाटरफाइनलमा फिफा वरीयताको शीर्ष टिम बेल्जियमलाई हराउँदै सेमिफाइनलमा स्थान बनाएको थियो । जसमा इटालीले बेल्जियमलाई २-१ गोल अन्तरले क्वाटरफाइनलमा पाखा लगाएको थियो ।
तीन पटकको च्याम्पियन स्पेनले भने क्वाटरफाइनलमा स्विट्जरल्यान्डलाई पेनाल्टी सुटआउटमा ३-१ गोल अन्तरले पराजित गर्दै सेमिफाइनलमा स्थान बनाएको हो ।
इटाली र स्पेनबीच हेड टु हेडको कुरा गर्दा हालसम्म ३३ खेलमा आमनेसामने भएका छन् । जसमा स्पेनले १२ खेल जितेको छ भने ९ खेलमा इटाली विजयी बनेको छ । यस्तै १२ खेल बराबरीमा टुंगिएको छ ।
