काठमाडौँ । जनता समाजवादी पार्टी, नेपालका अध्यक्ष उपेन्द्र यादवले आफ्नो पार्टीलाई उपराष्ट्रपति दिन नेकपा (माओवादी केन्द्र) सकारात्मक भएको बताउनुभएको छ ।
बिहीवार सिंहदरबारस्थित माओवादी केन्द्रको संसदीय दलमा नेकपा(माओवादी केन्द्र)का अध्यक्ष तथा प्रधानमन्त्री पुष्पकमल दाहालसँगको छलफलपछि सञ्चारकर्मीहरुलाई प्रतिक्रिया दिँदै उहाँले यस्तो बताउनुभएको हो । छलफलका क्रममा आफूहरुले राष्ट्रपति, उपराष्ट्रपतिको निर्वाचन तथा सरकारको विषयमा धारणा राखेको उहाँले बताउनु भयो । प्रधानमन्त्री दाहाल जसपालाई उपराष्ट्रपति दिन सकारात्मक भएको उहाँले बताउनु भयो । उहाँले आगामी दिनमा सरकारको विषयमा पनि छलफल हुने बताउनु भयो ।
उहाँले भन्नुभयो – ‘उपराष्ट्रपति, राष्ट्रपति, सरकार लगायतका विषयहरुमा हामीले आफ्नो धारणा राख्ने काम गर्यौँ । माओवादी अत्यन्त सकारात्मक हुनुहुन्छ । सरकारलाई गतिशिल बनाउने कुराहरु फेरी अन्यत्र पनि जोडिएका छन् । अहिलेको सरकार त हामी बाहेकको सरकार न हो । एमाले र माओवादी लगायतका पार्टीहरुको सहकार्यमा बनेको सरकार हो । त्यसको विषय के हो त ? अब कहीँ न कहीँ एउटा किनारा त लाग्नुपर्यो । कि यता कि उता । त्यसका विषयमा पनि छलफल हुने आउने दिनमा । माओवादीहरु, प्रचण्डजीहरु जसपालाई उपराष्ट्रपति दिने विषयमा सकारात्मक रहनुभएको छ ।’
अध्यक्ष यादवले प्रधानमन्त्री दाहालले जुनसुकै काम गर्दापनि नेपाली काँग्रेसलाई सहमतिमा लिएर जान चाहेको धारणा व्यक्त गर्नुभएको उल्लेख गर्नुभयो । दाहालले आगामी दिनमा काँग्रेससँग सहकार्य गर्नुपर्नेमा जोड दिनुभएको उहाँको भनाई छ ।
उहाँले भन्नुभयो – ‘प्रचण्डले अहिले कांग्रेसलाई पनि समेटेर लानुपर्छ भन्ने उहाँको हो । काँग्रेसलाई पनि समेट्नुपर्ने अवस्था हो । सहकार्य गर्नुपर्छ र जे गर्दापनि काँग्रेसको पनि समझदारी चाहिन्छ भन्नुभयो । काँग्रेसलाई पनि सहमतीमा लिएर जानुपर्दछ भन्ने उहाँको इच्छा हो ।’
साँझमा पुन: प्रधानमन्त्री पुष्पकमल दाहाल, नेकपा (एकीकृत समाजवादी) का अध्यक्ष माधवकुमार नेपाल र आफूसहितका नेताहरु छलफलमा जुट्ने उहाँले जानकारी दिनुभयो ।
