काठमाडौँ । आईसीसी विश्वकप लिग टूको अन्तिम त्रिकोणात्मक सिरिजमा नेपालले पपुवा न्यु गिनी(पीएनजी)लाई हराएको छ । पीएनजीले जितको लागि दिएको सामान्य ९६ रनको लक्ष्य नेपालले ७.४ ओभरमा १ विकेटको क्षतिमा पूरा गर्यो ।
नेपालको जितमा ओपनर आसिफ शेख २१ बलमा ८ चौका र ३ छक्कासहित ५३ रनमा अविजित रहे । ओडिआई करिअरमा आसिफको यो आठौं अर्धशतक हो । अर्का ओपनर कुशल भुर्तेल ३३ रन बनाएर आउट भए । उनले चार चौका र दुई छक्का प्रहार गरेका थिए । कुशल मल्ल १३ बलमा १ चौका र १ छक्कासहित १२ रनमा अविजित रहे ।
टस हारेर पहिले ब्याटिङको निम्तो पाएको पीएनजीले ३२ ओभरमा अलआउट हुदै ९५ रन बनाएको थियो । पीएनजीको लागि आसद भालाले सर्वाधिक २० रन बनाए । यस्तै, सेसे बाउ १८, हिरि हिरि१४ र चाल्स अमिनि १६ रन बनाएर आउट भए । पीएनजीका अन्य ब्याटरले भने दोहोरो अंकमा रन बनाउन सकेनन् ।
नेपालको लागि स्पिनर सन्दीप लामिछानेले सर्वाधिक पाँच विकेट लिए । उनले १० ओभर बलिङ गरेर २५ रन दिदै ५ विकेट लिए । ललित राजवंशी र कुशल मल्लले दुईरदुई विकेट लिए भने सोमपाल कामीले एक विकेट लिए ।
नेपालले अव विहीबार युएईसँग खेल्नेछ । उक्त खेलमा विजयी भएमा नेपालले जिम्बावेमा हुने एकदिवसीय विश्वकप छनोट सोझै खेल्न पाउँछ । पराजित भएमा पनि नेपालले यसै महिना अन्तिममा नामिबियामा हुने क्वालिफायर प्लेअफ खेल्नेछ । क्वालिफायर प्लेअफमा शीर्ष दुईमा रहने टोलीले पुन विश्वकप छनोट खेल्न पाउनेछन् । यससँगै,नेपालले पछिल्ला ११ मध्ये १० खेल जितेको छ ।
