काठमाडौं । नेकपा (एमाले)का सचेतक एवं प्रतिनिधिसभा सदस्य महेश बर्तौलाले यो कसको सरकार हो भन्दै प्रश्न उठाएका छन् ।
आइतबारको संसद्को शून्य समयमा बोल्दै बर्तौलाले किसानलाई दिँदै आएको अनुदान काट्ने, मूल्यवृृद्धि चरम अवस्थामा पुग्दा पनि अझ मूल्य वृद्धि गर्ने सरकारले कसको प्रतिनिधित्व गर्छ भन्दै प्रश्न उठाएका हुन् ।
उनले प्रश्न गरे “यो कसको सरकार हो ? कसका लागि काम गरिरहेको छ ? नेपालका किसानहरूलाई एक बोरा मल समेत समयमा उपलब्ध गराउन नसक्ने यो सरकारले किसानको ढाड सेक्ने गरी मलमा मूल्यवृद्धि गरेको छ । मलमा दिँदै आएको अनुदान कटौती गरेको छ । कहिलेसम्म नेपाली जनताले यो प्रकारको अन्याय सहनुपर्ने हो ।”
सांसद बर्तौलाले अगाडि भने ‘भूमिहिन सुकुम्बासीले जग्गाधनी प्रमाणपत्र पाउने मितिसमेत थाहा छैन । उनीहरूले कहिलेसम्म जग्गाधनी प्रमाणपत्र पाउँछन् भनी म सरकारलाई प्रश्न गर्न चाहन्छु ।’
