सुनसरी । बीपी कोइराला स्वास्थ्य विज्ञान प्रतिष्ठानका उपकुलपति डा.ज्ञानेन्द्र गिरिलाई धरानका राजनीतिक दल र नागरिक दबाब सञ्जालले ३ दिनभित्र प्रतिष्ठानमा हाजिर हुन अल्टिमेटम जारी गरेका छन् ।
राजनीतिक दल र नागरिक दबाब सञ्जालले उपकुलपति गिरिले प्रतिष्ठानलाई अस्तव्यस्त अवस्थामै छोडेर १८ दिनदेखि लापता भएको भन्दै ३ दिनभित्र सम्पर्कमा आएर वार्ता गर्न अल्टिमेटम दिएका हुन् ।
सञ्जाललाई साथ दिँदै धरानका ९ राजनितिक दलले पनि प्रतिष्ठानमा देखिएको सबै खाले विकृति, विसंगति र अनियमितता अन्त्यका लागि जस्तोसुकै कदम पनि चाल्न तयार रहने प्रतिबद्धता जनाएका छन् ।
प्रतिष्ठानको विधानअनुसार उपकुलपतिलाई सर्वेसर्वा बनाएको छ । बाँकी तीन पदाधिकारी उपकुलपतिले दिएको अधिकारको आधारमामात्र चल्नुपर्ने बाध्यता भएपछि डा. गिरिको अनुपस्थितिमा हालसम्म कुनै वार्ता हुन नसक्दा आक्रोशित बनेका संघर्ष समितिले सवारी साधनको चाबी नियन्त्रणमा समेत लिएका छन् ।
