काठमाडौं। बलिउड अभिनेता सलमान खान स्टारर फिल्म ‘राधेः योर मोस्ट वान्टेड भाइ’ सिनेमाघरमा रिलिज भएको छ । महाराष्ट्र सरकारले कोरोना कर्फ्यु खुकुलो पारेर राज्यभर सिनेमा हल खोल्ने अनुमति दिएपछि सलमानको फिल्म राधेले हल पाएको हो ।
मुम्बइका दुई सिनेमाघरमा सलमानको फिल्म राधे ठूलो पर्दामा देखाइँदैछ । मालेगांवस्थित ड्राइभ इन सिनेमा र औरंगाबाद स्टारर खिनवासरा सिनेप्लेक्समा यो फिल्म प्रदर्शन भइरहेको छ ।
जानकारीअनुसार मालेगांवमा फिल्मको राती साढे ७ र साढे ९ गरी २ शो र खिनवासरा सिनेप्लेक्समा दिउँसो १२ बजे, ३ बजे, सवा ६ बजे र साढे ९ बजे गरी ४ शो प्रदर्शन भइरहेको छ ।
बलिउड हंगामाले ड्राइभ इन सिनेमाका मालिक तुषार तिषागेलाई उद्धृत गर्दै लेखेअनुसार शुक्रबार राती साढे ७ बजेको शो २२ जनाले गाडीमा बसेर तथा ४० जनाले कुर्सीमा बसेर हेरेका छन् ।
रिपोर्टमा ट्रेडका सूत्रको हवाला दिँदै बताइएअनुसार मालेगांवको ड्राइभ इन सिनेमाले शुक्रबार ३ हजार ५९७ रुपैयाँ ८६ पैसा कमाएको छ । खिनवासरा सिनेप्लेक्सले २ हजार ४२० रुपैयाँ कमाएको छ । शुक्रबार फिल्मको कूल कमाइ ६ हजार १७ रुपैयाँ ८६ पैसा भएको छ ।
