काठमाडौँ । प्रमुख प्रतिपक्ष दल नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले पशुपतिमा सुनको जलहरी प्रकरणमा तथ्यहीन आरोप लगाइएको बताएका छन् ।
पार्टी मुख्यालय च्यासलमा एमालेबाट स्थानीय तहमा निर्वाचित जनप्रतिनिधिका लागि अनुशिक्षणमा सम्बोधन गर्दै अध्यक्ष ओलीले एमालेलाई चौतर्फी घेराबन्दी भइरहेको बताउँदै यस्तो प्रतिक्रिया दिएका हुन् ।
ओलीले भने ‘अस्तिमात्रै एकजना माओवादीका सांसदले रोष्ट्रममा उभिएर बोल्दै गर्दा कोभिडको औषधिमा दुई अर्ब केपी ओलीले खायो, कहाँ गयो त्यो पैसा ? पशुपतिमा सुनको जलहरी चढाउँछु भनेर पित्तलको जलहरी हालेर भ्रष्टाचार गर्यो भनेर बोले । संसद अवरूद्ध हुनैपर्छ, किनभने यस्तो बकवास ! जँड्याहाले जाँड खाएको तालमा पनि त्यस्तो कुरा बोल्दैन ।’
उनले संसद्जस्तो गरिमामय ठाउँमा कोभिड १९ का बेला औषधी उपकरण खरिद्मा दुई अर्ब खाएको भन्ने आरोप लगाएको भन्दै आक्रोश समेत पोखे ।
ओलीले अगाडि थपे – ‘नेकपा एमाले, त्यसमा पनि केपी ओली जसले जिन्दगीभरि भ्रष्टाचारको विरूद्धमा अभियान चलाएर आएको छु । त्यही मानिसकोविरूद्ध ? यो त इमानका शत्रुहरूले गर्ने काम हो । देशद्रोही तत्वहरूले गर्ने काम हो ।’
एमाले भ्रष्टाचारको सधैं विरोधी र स्वच्छता, पारदर्शिताको पक्षपोषक भएको बताउँदै ओलीले नक्कली भुटानी शरणार्थी प्रकरणको निशाना एमालेलाई बनाइएको आरोप समेत लगाए ।
