काठमाडौँ । नेपालले साफ च्याम्पियनसिप फुटबल–२०२३ को हारबाट सुरुवात गरेको छ । भारतको बैंगलोरस्थित श्री कान्तिरभा रंगशालामा भएको उद्घाटन खेलमा नेपाल ३–१ गोलले पराजित भएको हो ।
कुवेतको जितमा खलिद हजिया, सबाइब अलखादी र मोहम्मद अबदुल्लाहले गोल गरे । नेपालका अन्जन विस्टले एक गोल फर्काए । खेलको २३ औं मिनेटमा हजियाले गोल गर्दै कुवेतलाई सुरुवाती अग्रता दिलाएका थिए । उनले कर्नरबाट आएको बललाई हेडरमार्फत गोल गरेका हुन्
यस्तै, ४१ औं मिनेटमा अलखादीले गोल गर्दै कुवेतको अग्रता दोब्बर पारे । नेपालका डिफेन्डर बिमल पाण्डेलाई डी–बक्सभित्र बीट गर्दै उनले सुन्दर गोल गरे ।
६५ औं मिनेटमा अबदुल्लाहले गोल गर्दै कुवेतलाई ३–० ले अघि बढाए । उनले पेनाल्टीमार्फत गोल गरेका हुन् । क्रस आएको बलले नेपालका अनन्त तामाङलाई हातमा लागेपछि कुवेतले पेनाल्टी पाएको थियो ।
यता, ६८ औं मिनेटमा अन्जनले गोल गर्दै नेपाललाई १–३ को अवस्थामा ल्याए । अन्जनको यो नेपालका लागि १२ औं गोल हो । समूह ‘ए’मा रहेको नेपालले अब २४ जुन आयोजक तथा डिफेन्डिङ च्याम्पियन भारत र २७ जुनमा पाकिस्तानसँग खेल्नेछ ।
नेपालको समूहमा भारत, कुवेत र पाकिस्तान रहेका छन् । त्यस्तै समूह ‘बी’मा लेवनान, बंगलादेश, माल्दिभ्स र भुटान रहेका छन् । प्रत्येक समूहको शिर्ष दुई टोली सेमिफाइनलमा प्रवेश गर्नेछन् । फाइनल खेल ४ जुलाईमा हुनेछ ।
