विराटनगर । कोशी प्रदेशका नेकपा (माओवादी केन्द)का सासंद नारायण बुर्जा मगरले राजीनामा दिने मनसायमा पुगेको बताएका छन् ।
दुई्दुई पटक चुनाव जितेर आउँदा पनि मन्त्री बन्नबाट बञ्चित भएको भन्दै कोशी प्रदेशसभा सदस्य मगरले पदबाट राजीनामा दिने मनसायमा पुगेको जनाएका हुन् ।
सामाजिक सञ्जाल फेसबुकमा गुनासो पोख्दै सांसद मगरले पार्टीमा दुईदुई पटक चुनाव जित्दा पनि पार्टीले न्यायोचित मुल्यांकन गर्न नसकेको र कोशी प्रदेश सरकार गठनप्रति आफ्नो विमति भएको उल्लेख गरेका छन् ।
शनिबार बसेको संसदीय दलको बैठकले जीवन आचार्य र नारयाण बुर्जा मगरलाई सरकारमा पठाउने सहमति गरेको थियो । तर, आज माओवादीले संखुवासभाका राजेन्द्र कार्कीलाई मन्त्री बनाएपछि उनी असन्तुष्ट बनेका हुन् ।
मंसिरमा भएको निर्वाचनमा उनी उदयपुरको क्षेत्र नम्बर २ को प्रदेश सभा १ बाट निर्वाचित माओवादी सांसद हुन् । अघिल्लो प्रदेशसभामा पनि मगर सोही क्षेत्रबाट निर्वाचित भएका थिए ।
