काठमाडौँ । नेपाल आयल निगमले गएको एक आर्थिक वर्षमा १८ अर्ब रुपैँयानाफा कमाएको छ । निगमले दुई वर्षपछि पेट्रोलियम पदार्थको व्यापार गरेर एकै वर्षमा ३१ अर्ब बक्यौता र ऋण तिरेर १८ अर्ब रुपैँया नाफा कमाएको हो ।
रुस–युक्रेन युद्धका कारण अघिल्ला दुई वर्षदेखि घाटामा रहेको निगमले आव २०७९/८० मा १८ अर्ब नाफा कमाएको हो ।
युद्धका कारण पेट्रोलियम पदार्थको मूल्य बढ्दै गएपछि निगमले भारतबाट महँगो मूल्यमा खरिद गरेर सस्तो मूल्यमा स्थानीय बजारमा बिक्री गर्दा घाटामा गएको थियो । रकम भुक्तानी गर्न जग्गा धितोमा बैङ्कबाट ऋण लिएको निगम पछिल्लो १० महिनादेखि अन्तर्राष्ट्रिय बजारमा इन्धनको मूल्य घट्दै गएपछि तेल खरिद गरेको भुक्तानी तिरेर नाफा कमाउन सफल भएको हो ।
आव २०७८/७९ मा ४८ अर्ब ९५ करोड रुपैँया घाटा बेहोरेको निगमले जनाएको छ। त्यस्तै आव २०७७/७८ मा पनि ५९ करोड घाटामा थियो । निगमका नायब कार्यकारी निर्देशक नागेन्द्र साहले पेट्रोलियम पदार्थको कारोबार गरेर एक वर्षमा १८ अर्ब रुपैँया नाफा कमाउन सफल भएको जानकारी दिए ।
“रुस–युक्रेन युद्धका कारण महँगोमा इन्धन खरिद गरेर सस्तोमा बिक्री गर्दा दुई वर्षदेखि लगातर निगम घाटामा गएको थियो,” साहले भने “आव २०७९/८० को भदौ–असोजदेखि अन्तर्राष्ट्रिय बजारमा मूल्य घट्दै गएकाले इन्डियल आयल कर्पोरेसन (आइओस) को ३१ अर्ब ऋण तिरेर नाफा कमाउन सफल भएका छौँ ।”
मूल्य स्थिरीकरण कोषमा राख्नुपर्ने साढे तीन अर्ब र भ्याटबापतको साढे तीन अर्ब रुपैँयासमेत आइओसीलाई तिरेको निगमले जनाएको छ । राष्ट्रिय वाणिज्य बैङ्कबाट जग्गा धितो राखेर लिएको साढे तीन अर्ब रुपैँया समेत तिरिसकेको निगमले जनाएको छ ।
यो समाचार गोरखापत्र दैनिकमा छ।
