एजेन्सी । फिल्ममेकर एसएस राजामौलीले दादासाहेब फाल्केको जीवनीमा चलचित्र बनाउने भएका छन् । यस फिल्ममा भारतीय सिनेमाको सुरुदेखि अहिलेसम्मको यात्रा देखाइनेछ ।
फिल्मको शीर्षक ‘मेड इन इन्डिया’ हुनेछ । फिल्मको निर्देशक नितिन कक्कड हुनेछन् । हालै राजामौलीले सामाजिक सञ्जालमा फिल्मको घोषणा टिजर सेयर गरेका छन् ।
राजामौलीका छोरा एसएस कार्तिकेय र वरुण गुप्ताले संयुक्त रूपमा फिल्म निर्माण गर्नेछन् । यो फिल्म मराठी, तेलुगु, हिन्दी, मलयालम र कन्नड भाषामा रिलिज हुनेछ ।
टिजरमा लेखिएको छ– ‘भारतीय सिनेमामा धेरै मानिसमाथि धेरै किसिमको बायोपिक बनाइएको छ । तर, अब भारतीय सिनेमालाई लिएर बायोपिक बन्दैछ । एसएस राजामौली लिएर आउँदैछन् – मेड इन इन्डिया
चलचित्रको कलाकार भने तय भइसकेको छैन । फिल्मका निर्देशक नितिन कक्कडले २०१२ मा फिल्मिस्तान, २०१८ मा मित्रन र २०१९ मा नोटबुक जस्ता फिल्म बनाएका छन् । योसँगै फिल्मका निर्माता एसएस कार्तिकेयले आफ्ना पिता राजामौलीको फिल्म आरआरआरमा लाइन प्रोड्युसरको रूपमा काम गरेका छन् ।
दादासाहेब फाल्केलाई भारतीय सिनेमाका पिता पनि भनिन्छ । फाल्केले १९१३ मा पहिलो फुल लेन्थ भारतीय फिल्म बनाए – राजा हरिश्चन्द्र । यसपछि उनले थप २७ वटा सर्ट फिल्म बनाए । करिब दुई दशक लामो करियरमा उनले जम्मा ९० वटा चलचित्र बनाए ।
