एजेन्सी । क्रिकेट विश्वकप २०२३ अन्तर्गतको अन्तिम लिग खेलमा मिचेल मार्सको शानदार शतकमा अस्ट्रेलियाले बंगलादेशलाई ८ विकेटले पराजित गरेको छ । जितको लागि ३ सय ७ रनको लक्ष्य पाएको अस्ट्रेलियाले ४४.४ ओभरमा २ विकेटको क्षतिमा पुरा गर्यो ।
अस्ट्रेलियाको लागि मार्सले नटआउट रहँदै १ सय ७७ रन बनाए । उनले १ सय ३२ बलमा १७ चौका र ९ छक्का प्रहार गरे । उनलाई स्टिभ स्मिथले ६३ रन बनाउँदै अन्तिमसम्म साथ दिए । ओपनर डेभिड वार्नरले ५३ रन बनाए ।
यसअघि पुणेस्थित महाराष्ट्र क्रिकेट स्टेडियममा टस हारेर पहिले ब्याटिङ गरेको बंगलादेशले निर्धारित ५० ओभरमा ८ विकेटको क्षतिमा ३ सय ६ रन बनाएको थियो । बंगलादेशका लागि तौहिद हृडोयले ७९ बलमा ५ चौका र २ छक्का प्रहार गर्दै ७४ रन बनाए । आजका कप्तान रहेका नजमुल हसन शान्तोले ५७ बलमा ६ चौका प्रहार गर्दै ४५ रन जोडे । त्यसैगरी, ओपनर तान्जिद हसन र लिट्टन दास दुवैले ३६ रन बनाए । मोहम्मदुल्लाहले ३२ रन बनाए भने मेहदी हसन मिराजले २९ रन बनाए ।
अस्ट्रेलियाका लागि सन एबट र एडम जाम्पाले २–२ तथा मार्कस स्टोइनिसले १ विकेट लिए । बंगलादेशका अन्य तीन जना ब्याट्सम्यान रन आउट भएका थिए ।
बंगलादेश यसअघि नै प्रतियोगिताबाट बाहिरिसकेको भने अष्ट्रेलिया सेमिफाइनलमा पुगिसकेको छ । अष्ट्रेलियाले सेमिफाइनलमा दक्षिण अफ्रिकाको सामना गर्नेछ।
