एजेन्सी । ‘सीआईडी’का चर्चित अभिनेता दिनेश फडनीस अका अफिसर फ्रेडरिक्सको निधन भएको छ ।
सोनी टिभीको लोकप्रिय क्राइम शो ‘सीआईडी’ को चर्चित पात्र निभाएका दिनेशको सोमबार राति १२:०८ बजे कान्दिवलीको थुंगा अस्पतालमा निधन भएको हो ।
दिनेश फडणीसको मल्टिपल अर्गन फेलियरका कारण निधन भएको एविपी न्यूजले लेखेको छ । ५७ वर्षको उमेरमा निधन भएका दिनेश धेरै समय देखि कलेजो, मुटु र मृगौलाको समस्याबाट पीडित रहेका थिए।
दिनेश नोभेम्बर ३० मा कान्दिवलीको थुंगा अस्पतालमा भर्ना भएका थिए । उनको अन्तिम संस्कार बोरिवलीको दौलत नगर श्मशान स्थलमा गरिने छ ।
बीस वर्षभन्दा बढी समयसम्म, दिनेश फ्रेडरिक्स उर्फ फ्रेडीको रूपमा ‘सीआईडी’को हिस्सा थिए। ‘सीआईडी’मा कामको साथसाथै, दिनेशले हिट टिभी शो ‘तारक मेहता का उल्टा चश्मा’ मा पनि छोटो उपस्थिति देखाएका थिए । उनले ‘सरफरोश’ र ‘सुपर ३०’ लगायतका फिल्महरूमा पनि सपोर्टिङ पार्टमा खेलेका थिए।
