कोभिड १९ ले संसारलाई नै असर गरेको एक वर्ष नाघिसकेको छ । विश्वव्यापीरुपमै यसले थुप्रै मानिसको ज्यान लियो । यसबाट मानव समाजलाई उन्मुक्ति दिनका लागि विभिन्न मुलुकले भ्याक्सिनहरु निर्माण गरी यसलाई कसरी परास्त गर्न सकिन्छ भनेर अध्ययन अनुसन्धानमा पनि लागे । छिमेकी मुलुक चीनले आफ्नो देशका नागरिकलाई यसबाट कसरी जोगाउने भन्दै भ्याक्सिन निर्माणमा पनि अगाडि बढ्यो ।
चीनको सिनोभ्याक बायोटेकले खोप उत्पादन गरिरहेको अवस्थामा हामीले यसबारे कुरा गर्दै कम्पनी पनि भ्रमण गर्यौँ । त्यहीअनुसार हामीले कति मात्रामा हामीलाई भ्याक्सिन उपलब्ध गराउन सकिन्छ भन्नेबारे पनि छलफल गर्योँ । त्यसमा नेपाल सरकारसँग पनि हाम्रो छलफल रह्यो । सुरुमा ३ लाख खोप उपलब्ध गराउने भन्ने कुरा भएको थियो । त्यसको लगत्तै परराष्ट्रमन्त्रीसँग परामर्श गरियो ।
जसमा ५ लाख खोप उपलब्ध गराइने कुराकानी भयो । हामीले नेपाल सरकारसँग जहाज भाडा तिरेर नेपाल पठाउनुपर्ने भएकाले यसमा वृद्धि गराई १०-१५ लाख भ्याक्सिन पठाउन कुरा अगाडी बढेको थियो । त्यसै सन्दर्भमा ८ लाख खोप पठाइने निर्णय गरियो । अहिलेको चरणमा ८ लाख खोप उपलब्ध गराइने र यसको प्रयोग गदै गर्ने पछि अर्को चरणमा नेपाल छिमेकी राष्ट्र पनि भएकाले प्राथामिकतामा राखिएको उहाँहरुले बचन दिनुभएको छ ।
यस कम्पनिले विभिन्न ७-८ स्थानहरुमा खोपको उत्पादन थालिरहेकाले प्रशस्त मात्रामा खोप उत्पादन हुने देखिन्छ । जसअनुसार विश्वका विभिन्न मुलुकहरुले आफ्ना लागि आवश्यक पर्ने खोप चीनबाट उपलब्ध गराइने नीति रहेकाले नेपाललाई पनि खोप प्रदान गरिएको छ । जसको मात्रा पछि थप्ने निर्णय पनि भएको छ । यसबाट नेपालमा कोरोना भाइरस नियन्त्रणका लागि ठूलो योगदान मिल्ने विश्वास लिइएको छ ।
यसबाट चीन र नेपालको सम्बन्धमा अझ प्रगाढ मिल्नुका साथै जनजीवनलाई यसले संरक्षण गर्नमा ठूलो योगदान गर्छ भन्नेमा हामी विश्वस्त छौं । नेपाललाई प्रदान गराइने ८ लाख खोप एयरपोर्टमा पुर्याउने र हामीले सिनोफार्मसँग बुझेर नेपाल पठाउने व्यवस्था हामीले मिलायौँ । जसअनुसार नेपालबाट जहाज आई यसलाई नेपाल पुर्याइने व्यवस्था गरिएको होे । जसअनुसार नेपाल सरकार र चिनियाँ राजदुतबीच खोप लेनदेनको प्रक्रिया सम्पन्न भयो । यस भ्याक्सिनले नेपाली जनताको जनजीवनको संरक्षणमा सकरात्मक भूमिका खेल्ने र भविष्यमा थप मात्रामा खोप उपलब्ध गराइनेमा हामी विश्वस्त रहेका छौं ।
(चीनका लागि नेपाली राजदुत महेन्द्र बहादुर पाण्डेसँग न्यूजपोलारले गरेको कुराकानीमा आधारित)
