काठमाडौं । दाँतको भूमिका खाना चपाउनका लागि मात्र होइन, सुन्दर देखाउन पनि हो ।
तर यहि दाँतको ख्याल भने हामीले त्यति गरेको पाईँदैन । नदुखेसम्म वा समस्या नआउँदासम्म दाँतको बारेमा खास ध्यान दिँदैनौँ । सरसफाईमा कमी तथा खानपानमा ख्याल नगर्दा दाँतमा विभिन्न समस्या देखिने गरेको चिकित्सकको भनाई छ ।
मुख स्वास्थ्यको मात्र हेरचाह गर्दा पनि ९० प्रतिशत रोग लाग्न पाउदैनन् । यही मुखको सबैभन्दा महत्वपूर्ण अंग हो दाँत । त्यसैले दाँतको सरसफाई र स्वस्थताका विषयमा बरिष्ठ दत्त चिकित्सक डा.प्रकाश भट्टराईले यसका सुरक्षाका सुत्रहरु बताउनु भएको छ ।
दाँतको सुरक्षाका लागि चिकित्सकको सुझाब
सकेसम्म जङ्क फुड र फास्ट फुडको कम प्रयोग गर्ने । किनकी एसिडिक खानेकुरा, कोल्ड ड्रिंक्स खाएको आधा या एक घण्टासम्म ब्रस गरिएन भने त्यसले दाँतलाई कमजोर बनाउँछ ।
-धेरै तातो र चिसो खानेकुरा एकैपटक नखाने, तातो चिसो खादाँ दाँतको संवेदनशीलतामा ह्रास आउने गर्छ ।
– खाना खाइसकेपछि या गुलियो खानेकुरा खाएपछि ब्रस गर्नुपर्छ , ब्रस गर्न नमिलेमा मुख राम्रोसँग कुल्ला गर्नुपर्छ ।
-सूर्तिजन्य पदार्थ सेवनका कारण दाँत फोहोर देखिनुका साथै अरु समस्या देखिन्छ । तसर्थ यस्ता पदार्थको सेवन नगर्दा दाँतलाई सुरक्षित राख्न सकिन्छ ।
-दाँतको बिचमा जमेको फोहोरले गर्दा श्वास गनाउने हुदाँ खाना खाइसकेपछि डेन्टल फल्स र या दाँतमा अड्किएको फोहोर निकाल्न इन्टरडेन्टल ब्रसको प्रयोग गर्न सकिन्छ ।
-गुलियो, क्यामिकलयुक्त र जङ्क फुटको प्रयोगले दाँतमा ब्याक्टेरिया संक्रमण ल्याउने र दाँत दुख्न सक्ने हुनाले दिनको दुईपटक खाना खाईसकेपछि ब्रस गर्नुपर्छ ।
-दाँतको सामान्य दुखाईमा नुनपानीले मुख कुल्ला गर्ने
-दाँतको समस्या हुनेले साह्रो खानेकुराको प्रयोग कम गर्ने फ्लोराईडयुक्त टुथपेस्टको प्रयोग गर्ने
-महिनाको फरकमा दाँतको जाचँ गराउने
