एजेन्सी । जय शाहले एसियाली क्रिकेट काउन्सिल (एसीसी)को अध्यक्ष पदबाट राजीनामा दिन सक्नेछन् ।
भारतीय क्रिकेट कन्ट्रोल बोर्ड (बीसीसीआई)मा सचिव पदमा कार्यरत शाहले आईसीसी अध्यक्ष पदका लागि चुनाव लड्ने छन् । त्यसैले उनले एसीसीको पद छाड्न सक्ने बताइएको छ ।
एसीसीको वार्षिक साधारण सभा आज अर्थात मङ्गलबारदेखि इन्डोनेसियाको बालीमा सुरु हुँदैछ । बैठक २ दिनसम्म चल्नेछ । बैठकमा एसीसीको प्रसारण अधिकारबारे पनि निर्णय हुने छ ।
एसीसी अध्यक्ष पदका लागि प्रत्येक २ वर्षमा एकपटक निर्वाचन हुने गरेको छ, जय शाहले हाल आफ्नो पदको एक वर्ष पूरा गरेका छन् । आईसीसीको अध्यक्ष पदका लागि लड्नु पर्ने भएकाले आगामी निर्वाचनअघि नै उनले पद छाड्ने विश्वास गरिएको छ ।
यसै वर्षको नोभेम्बरमा अन्तर्राष्ट्रिय क्रिकेट काउन्सिल (आइसिसी)को निर्वाचन हुँदैछ, त्यसअघि एसीसीको बैठकमा शाहले आईसीसीको अध्यक्षमा उम्मेदवारी दिने कि नदिने भन्ने टुंगो लाग्ने बताइएको छ ।
