एजेन्सी । विश्व कीर्तिमानी म्याराथन धावक केल्भिन किप्टम र उनका प्रशिक्षक गेर्भाइस हाकिजिमानाको आइतबार पश्चिमी केन्यामा कार दुर्घटनामा मृत्यु भएको छ ।
२४ वर्षीय किप्टम गाडीको नियन्त्रण गुमाएपछि कार सडक छोडेर करिब ६० मिटर टाढाको खाल्डोमा खसेर ठूलो रुखमा ठोक्किन पगुगेको थियो । एल्गेयो माराक्वेट काउन्टीका प्रहरी कमाण्डर पिटर मुलिङ्गका अनुसार दुर्घटना आइतबार राति ११ बजे (स्थानीय समय) एल्डोरेट–कप्तागाट सडकमा भएको हो ।
किप्टमले टोयोटा प्रिमियो चलाउँदै थिए, केन्याको अखबार डेली नेसनले रिपोर्ट गरेको छ । उनीसँग थप दुई यात्रु सवार थिए जसमा उनका कोच गेर्भाइस र एउटी महिला थिइन् जसको नाम शेरोन कोसगे रहेको बताइएको छ ।
दुर्घटनामा शारोन कोसगे गम्भीर घाइते भएकी थिइन् र उनलाई अस्पताल लगिएको थियो, जबकि एथलीट र उनका प्रशिक्षकले दुर्घटनामा ज्यान गुमाए । दुबैको शव रेसकोर्स अस्पतालको शवगृहमा राखिएको छ ।
किप्टम विगत केही वर्षहरूमा सडक दौडमा देखा पर्ने सबैभन्दा रोमाञ्चक नयाँ प्रतिभाहरू मध्ये एक थियो । उनले डिसेम्बर २०२२ मा भ्यालेन्सियामा २ः०१ः५३ मा आफ्नो म्याराथन डेब्यू जित्दा उनी चर्चामा आए ।
एक वर्ष भन्दा कम समयपछि आफ्नो तेस्रो म्याराथनमा, उनले शिकागोमा जित्नको लागि २ः००ः३५ को समयसँगै विश्व रेकर्ड तोडे । लन्डन म्याराथनमा २ः०१ः२५ को कोर्स रेकर्डमा उनको जितले उनलाई स्ट्याडिया बाहिरको पुरुष इभेन्टका लागि २०२३ को विश्व एथलीट अफ द इयर घोषित गरेको थियो ।
