काठमाडौं । आज देशभरको मौसम सामान्यत: बदली रहेको छ । जल तथा मौसम पूर्वानुमान महाशाखाले पश्चिमी वायु तथा स्थानीय वायुको प्रभावका कारण देशभर बदली भएको जनाएको छ ।
महाशाखाका अनुसार बिहानैदेखि देशभर आंशिकदेखि साधारणतया बदली भइरहेको छ । कोशी, बागमती र गण्डकी प्रदेशको पहाडी भूभागका केही स्थानमा हल्का वर्षासमेत भइरहेको छ ।
आज दिउँसो देशका पहाडी भूभागमा आंशिकदेखि साधारणतया बदली रहने छ । कोशी, बागमती र गण्डकी प्रदेशका पहाडी भूभागका केही स्थानमा मेघगर्जन र चट्याङसहित मध्यम वर्षा तथा बाँकी भूभागका एक–दुई स्थानमा वर्षाको सम्भावना रहेको महाशाखाले जनाएको छ ।
यसैगरी कर्णाली र सुदूरपश्चिम प्रदेशका उच्च पहाडी तथा हिमाली भूभागका एकदुई स्थानमा हल्का हिमपातको सम्भावना रहेको छ ।
आज राति देशका पहाडी भूभागमा आंशिकदेखि साधारणतया बदली रही बाँकी भूभागमा आंशिक बदली रहनेछ ।
