इजरायल । युद्धग्रस्त गाजामा राहत सामग्री पुर्याउन इजरायलले तीनवटा मानवीय मार्ग खोल्ने भएको छ ।
युद्ध सुरु भएयता पहिलो पटक उत्तरी गाजामा इरेज गेट अस्थायी रूपमा खोलिने भएको छ । मानवीय सहायता सामग्रीको आपूर्ति सहज बनाउन अस्दोद बन्दरगाह पनि खोलिने छ । यसबाहेक, जोर्डनबाट गाजामा राहत सामग्री प्रवेश गराउन केरेम शालोम क्रसिङ पनि खोलिने इजरायलले जनाएको छ ।
इजरायलका प्रधानमन्त्री बेन्जामिन नेतन्याहुले अमेरिकी राष्ट्रपति जो बाइडेनसँग टेलिफोन वार्तापछि मार्ग खोल्ने निर्णय गरेका हुन् ।
हालै गाजामा राहत सामग्री वितरण गर्ने सात जना कामदारको मृत्यु भएपछि प्रधानमन्त्री नेतन्याहुले अमेरिकी राष्ट्रपति जो बाइडेनसँग कुरा गरेका थिए । गत सोमबार गाजामा इजरायली हमलामा खाद्य तथा परोपकारी संस्था वल्र्ड सेन्ट्रल किचेनका सात जनाको ज्यान गएपछि संस्थाले राशन वितरणको काम रोकेको थियो ।
आक्रमण हुनुअघि सहायता कार्मचारीहरूले देइर अल–बालाहको एउटा गोदाममा १०० टन सामान उतारेका थिए ।
हमला गोदामबाट साढे दुई किलोमिटर टाढा भएको थियो । द्वन्द्व सुरु भएयता राहत सामग्री वितरणमा खटिएका कम्तीमा १९६ राहतकर्मीको मृत्यु भइसकेको छ ।
गाजामा अक्टोबर ७ मा हमासको आक्रमणपछि ३३ हजारभन्दा बढी मानिसको मृत्यु भइसकेको छ । यो तथ्यांक हमासले सञ्चालन गरेको गाजाको स्वास्थ्य मन्त्रालयले सार्वजनिक गरेको हो ।
इजरायली नाकाबन्दीका कारण गाजा पट्टीमा बसोबास गर्ने करिब २० लाख जनसंख्या भोकमरीको चरम संकटमा परेको र यस सम्बन्धमा संयुक्त राष्ट्रसंघको मानवीय सहायता निकायले पनि चेतावनी दिएको छ ।
