काठमाडौं । प्रधानमन्त्री केपी शर्मा ओलीले आ–आफ्नो जिम्मेवारीअनुसार काम गरी देशका लागि परिणाम दिनुपर्ने बताएका छन् ।
गत आर्थिक वर्षमा सञ्चालित कार्यक्रमको समीक्षा र चालु आर्थिक वर्षमा सञ्चालन हुने योजना तथा पूर्वतयारीबारे हिजो सिंहदरबारमा छलफल गरेपछि आज सामाजिक सञ्जालमार्फत् टिप्पणी गर्दै प्रधानमन्त्री ओलीले आफूहरु तलव खाएर दिन कटाउन मात्र नआएको स्पष्ट पारेका छन् । उनले जिम्मेवारी लिएर परिणाममा पुर्याउन आफूहरु आएकोसमेत बताएका छन् ।
प्रधानमन्त्री ओलीले अब कानुन मात्र दिएर नहुने, काम नै हुनुपर्ने बताएका छन् । एक ठाउँ सुध्रिएर पुग्दैन, सबै ठाउँमा सुध्रिनु आवश्यक छ भन्दै प्रधानमन्त्री ओलीले अबदेखि प्रधानमन्त्री / मन्त्री / मुख्यमन्त्रीजस्ता पदसँग जोडेर कार्यक्रमहरु नबनाउने घोषणा पनि गरेका छन् ।
प्रधानमन्त्री ओलीले सामाजिक सञ्जालमा के लेखेका छन् त ?
हामीले हिजो गत आर्थिक वर्षमा सञ्चालित कार्यक्रमको समीक्षा र चालु आर्थिक वर्षमा सञ्चालन हुने योजना र पूर्वतयारीबारे छलफल गर्यौं। यसपाली प्रधानमन्त्री/ मन्त्री/ मुख्यमन्त्रीजस्ता पदसँग जोडेर कार्यक्रमहरु बन्ने छैनन् । काम गर्दै जाँदा हामीमा केही अनुभव थपिएको छ – अब कानुन मात्र दिएर हुँदैन, काम हुनु पर्छ। एक ठाउँ मात्र सुध्रिएर पुग्दैन, सबै ठाउँ सुध्रिनु आवश्यक छ। एउटा ठाउँ वा एउटा पक्ष मात्र बिग्रेर देश बिग्रने होइन, बिग्रेको सबै सुधार हुनु पर्छ । हामी तलब खाएर दिन कटाउन होइन, जिम्मेवारी लिएर परिणाममा पुर्याउन आएका हौं भन्ने बुझौं ।
