काठमाडौं । सहकारी ठगीको आरोपमा प्रहरीले राष्ट्रिय स्वतन्त्र पार्टीका सभापति रवि लामिछाने आज पनि प्रहरीको निगरानीमा छन् ।
प्रहरीले रविका साझेदार छविलाल जोशी पक्राउ परेपछि अब रविलाई पनि निगरानी बढाएको हो । प्रहरीले रविका सबै गतिविधिको सुक्ष्म ढंगले निगरानी गरिरहेको छ ।
यसैबीच राष्ट्रिय स्वतन्त्र पार्टी (रास्वपा)का सभापति लामिछानले सरकारले अधिनायकवादी चरित्र देखाएको आरोप लगाएका छन् ।
हिजो राति पार्टीको केन्द्रीय कार्यलयमा भेला भएका कार्यकर्तालाई सम्बोधन गर्दै रविले सरकारले जे पनि गर्न सक्ने भन्दै देशभरका कार्यकर्ता र समर्थकहरूलाई अलर्ट बस्न आह्वान गरेका हुन् । उनले भने, ‘ढुक्क भएर बस्ने अवस्था छैन । मलाई सरकारले जे पनि गर्छ मलाई यो सरकारको विश्वास छैन । साथीहरू तयार तयार भएर बस्नुहोला । यसलाई नजिकबाट हेर्नुहोला । म कुनै व्यक्तिगत लाभको पक्षमा छैन । मलाई भरोसा छैन सरकारले जे पनि गर्न सक्छ । यो सरकार विरोधीहरूलाई धरपोखर गर्न बनेको सरकार हो । नयाँ शक्ति एकैठाउँ आउनका लाउनका लागि कसैले त्याग गर्नुपर्छ भने सबैभन्दा ठूलो ठूलो त्याग म गर्न तयार छु । म रास्वपा शुभचिन्तक नेपाली दाजुभाईहरुलाई अलर्टमा रहनको लागि अनुरोध गर्दछु ।’
उनले सरकारको ध्यान सहकारी पीडित बचतकर्ताको रकम फिर्ता गर्नेमा नभएर रवि लामिछानेलाई जेल हाल्ने मात्र रहेको बताए । उनले भने, ‘ध्यान बचत फिर्ता गराउनेमा छैन, यिनको ध्यान रवि लामिछानेलाई जेल पठाउनेमा छ, रास्वपालाई सिध्याउनेमा छ । जुन हामी हुनै दिँदैनौ ।’
