काठमाडौं । नेपाल साफ यू-१७ च्याम्पियनसिपको सेमिफाइनलमा प्रवेश गरेको छ ।
घरेलु टोली भुटानविरुद्ध समूहको अन्तिम खेलमा बुधबार २(१ को पुनरागमन जित निकाल्दै नेपालले सेमिफाइनलको टिकट काटेको हो ।
थिम्पुस्थित चाङ्लिमिथाङ स्टेडियममा भएको समूह बी को अन्तिम खेलमा कृष्ण बहादुर आले र सुजन डंगोलले दोस्रो हाफमा गोल गरेपछि नेपालले भुटानलाई पराजित गरेको हो ।
जितपछि नेपाल तीन खेलबाट ६ अंक जोडेर समूह बी को उपविजेताको रुपमा सेमिफाइनल पुगेको छ । दुई जित र एक बराबरीसहित ७ अंक जोडेको पाकिस्तान समूह बी को विजेता बन्दै सेमिफाइनल पुगिसकेको छ ।
नेपालले अब शनिबार हुने सेमिफाइनलमा समूह ए को विजेता भारतसँग प्रतिस्पर्धा गर्नेछ ।
अर्को सेमिफाइनल पाकिस्तान र बंगलादेशबीच शनिवारै हुनेछ । फाइनल खेल सोमबार हुनेछ ।
