काठमाडौँ । मानव अधिकार आयोगको टोलिले राष्ट्रिय स्वतन्त्र पार्टी (रास्वपा)का सभापति रवि लामिछानेसँग भेट गरेको छ ।
पूर्व उपप्रधान तथा गृहमन्त्री समेत रहेका लामिछानेलाई आराम गर्न नदिई बुधवार मध्यराति चितवनबाट पोखरा लगिएको विषयमा उनको पार्टीका नेता तथा समर्थकहरूले असन्तुष्टि व्यक्त गरेका छन् ।
यसै सन्दर्भमा जिल्ला प्रहरी कार्यालय, कास्कीमा हिरासतमा रहेका लामिछानेलाई राष्ट्रिय मानव अधिकार आयोग गण्डकी प्रदेश कार्यालयका निर्देशक नितु गड्तौलाले भेट गरेकी हुन् । गड्तौलाले सूचना र कानुनहरुको अध्ययन गरी केन्द्रीय कार्यालयमा पठाइने र थप कारबाही केन्द्रीय कार्यालयले गर्ने बताइन् ।
‘हामीले सूचना केन्द्रीय कार्यालयमा पठायौं । थप एक्शन केन्द्रीय कार्यालयले लिन्छ । हामी रवि लामिछानेमा मात्रै केन्द्रीत भएर आएका थियौं । अन्य विषयमा पनि समस्या छ भने आगामी दिनमा पनि कुरा अगाडि बढाउँछौँ ।’
जिल्ला अदालत कास्कीले अन्तिम पटक लामिछानेलाई हिरासतमा राख्न थप गरेको अवधि शुक्रवार साँझबाट सकिने छ ।
रास्वपा नेताहरूले राति ११ बजे चितवनबाट पोखरा हिँडाइएको दाबी गरेका छन् । तर, उनलाई १ बजेतिर चितवनबाट पोखरा पठाइएको प्रहरीले जनाएको छ ।
