एजेन्सी । सन् २०३४ को फिफा विश्वकप साउदी अरेबियामा हुने भएको छ । यस्तै, सन् २०३० को विश्वकप स्पेन, पोर्चुगल र मोरक्कोले संयुक्त रुपमा आयोजना गर्ने छन् ।
विश्व फुटबलको सर्वोच्च निकाय फिफाले बुधबार राति यस्तो घोषणा गरेको हो ।
साउदी अरेबियाले मात्र २०३४ को विश्वकप आयोजना गर्न दाबी गरेको थियो । यस्तो अवस्थामा जुरिचमा भएको विश्व निकायको विशेष बैठकपछि अध्यक्ष जियानी इन्फान्टिनोले साउदी अरेबियालाई आधिकारिक आयोजक घोषणा गरेका हुन् ।
रोनाल्डोले लेखे–सपना साकार भयो
यो घोषणा पछि, स्टार फुटबलर क्रिस्टियानो रोनाल्डोले खुशी व्यक्त गरेका छन् । ‘अहिलेसम्मको सबैभन्दा विशेष विश्वकप, सपना साकार भयो । पोर्चुगलले २०३० को विश्वकप आयोजना गर्नेछ र हामी यसमा गर्व गर्छौं ।’ उनले भनेका छन् ।
सन् १९३० मा उरुग्वेले पहिलो विश्वकप आयोजना गरेको थियो । यसले २०३० को विश्वकपको पहिलो खेल आयोजना गर्नेछ । उद्घाटन समारोह पनि यही देशमा हुनेछ । उरुग्वे बाहेक अर्जेन्टिना र पाराग्वेले पनि २०३० को विश्वकपमा एक–एक खेल आयोजना गर्ने छन् ।
आगामी विश्वकप सन् २०२६ मा हुनेछ । यसलाई संयुक्त राज्य अमेरिका, क्यानडा र मेक्सिकोले आयोजना गर्दैछन् ।
फुटबल विश्वकपको अन्तिम सिजन २०२२ मा कतारमा भएको थियो । अर्जेन्टिनाको टोलीले प्रतियोगिता जितेको थियो ।
