काठमाडौँ। ‘भक्तिराम उपाध्याय स्मृति ग्रन्थ’ सार्वजनिक भएको छ । सांसद सूर्य थापाले उक्त स्मृतिग्रन्थ आज यहाँ आयोजित कार्यक्रममा सार्वजनिक गर्नुभएको हो । उहाँले ग्रन्थले प्यूठानको इतिहासलाई उजागर गरेको बताउनुभयो ।
भक्तिराम उपाध्यायले प्यूठानको विकासमा योगदान गरेको चर्चा गर्दै सांसद थापाले उहाँले देखाएको मार्गदर्शनमा सबै लाग्नुपर्ने बताउनुभयो । प्यूठान शिक्षित र जागृत समाज रहेको उल्लेख गर्दै भक्तिराम जस्ता अन्य व्यक्तिबारे पनि संस्मरण ग्रन्थ लेख्न आवश्यक रहेको उहाँको भनाइ थियो ।
कृषि विकास बैंकका उपमहाप्रबन्धक मीनराज पोखरेलले भक्तिरामले प्यूठानको शिक्षा क्षेत्रमा पु¥याएको योगदान सराहनीय रहेको चर्चा गर्नुभयो । कार्यक्रममा भक्तिरामका छोरा हरिप्रसाद पोखरेलले बुवाले गरेको योगदानबारे जानकारी गराउन ग्रन्थ प्रकाशित गरिएको बताउनुभयो । ग्रन्थका सम्पादक जीवराम भट्टराईले ग्रन्थ युवा पुस्ताका लागि मार्गदर्शन बन्ने विश्वास व्यक्त गर्नुभयो ।
ग्रन्थमा ९८ जना व्यक्तिले भक्तिरामको बारेमा लेख्नुभएको छ । प्यूठान ओखरकोटमा जन्मिनुभएका भक्तिरामले तत्कालीन बिपी कोइरालाको नेतृत्वमा सञ्चालित विसं २००७ को क्रान्तिमा सक्रिय सहभागिता जनाउनुभएको उहाँका छोरा हरिप्रसाद पोखरेलले जानकारी दिनुभयो ।
बाल शिक्षा माध्यामिक विद्यालय, पूर्वविद्यार्थी समाजले ग्रन्थ प्रकाशन गरेको हो ।रासस
