काठमाडौं । राष्ट्रिय स्वतन्त्र पार्टीको आगामी वैशाख ४ गते बस्ने केन्द्रीय समितिको बैठकबारे कार्यवाहक सभापति डीपी अर्यालले पार्टी सभापति रवि लामिछानेसँग रुपन्देही जिल्ला कारागारमै पुगेर छलफल गरेका छन् ।
सहकारी ठगी प्रकरणमा उच्च अदालतको आदेशबाट सभापति लामिछाने रुपन्देही जिल्ला कारागारमा पुर्पक्षका लागि थुनामा छन् । उनलाई भेट्न आज कार्यवाहक सभापति अर्यालले कारागारमै पुगेका हुन् ।
त्यस क्रममा कार्यवाहक सभापति अर्यालले लामिछानेको हिरासत बसाईबारे समेत जानकारी लिएका थिए । दुई जना नेताबीच रास्वपाका आगामी महाधिवेशन, पार्टीको सांगठनिक अवस्थालगायतका विषयमा छलफल भएको बताइएको छ ।
रास्वपाले आगामी वैशाख २५, २६ र २७ गते पहिलो राष्ट्रिय महाधिवेशन गर्ने घोषणा गरेको थियो । तर सभापति लामिछाने पुर्पक्षका लागि कारागार चलान भएपछि अधिवेशन के गर्ने भन्ने अन्योलमा परेको छ ।
