काठमाडौं । भारत र पाकिस्तानले एक–आपसमा आक्रमण तीव्र पारेपछि अमेरिकाले शान्त रहद दुवै पक्षलाई आग्रह गरेको छ । अमेरिकाले युद्ध रोक्न आग्रह ग रेको हो । युद्धले समस्याको समाधान नगर्ने भन्दै एकअर्कामाथि आक्रमण बन्द गर्न उसले भनेको हो ।
अमेरिकी विदेश मन्त्रालयकी प्रवक्ता ट्यामी ब्रुसले पत्रकार सम्मेलनको क्रममा हिंसा, सैन्य कारबाही र युद्ध रोकिनुपर्छ भन्ने अमेरिकाको भनाइ रहेको बताइन् । ‘मध्यपूर्वमा यो प्रमाणित भइसकेको छ कि युद्धबाट कुनै समाधान निस्कँदैन,’ उनले भनिन् । उनले थपिन्, ‘युद्ध, सेना र हिंसा कुनै समाधान होइन । पुस्तौंदेखिका हिंसा र समस्यालाई रोक्न नयाँ विचार र कूटनीति नै समाधान हुन् ।’
सञ्चारकर्मीहरुको प्रश्नमा उनले भारत–पाकिस्तानबीच कुनै पनि प्रकारको मध्यस्थताको पुष्टि नगरेको र अस्वीकार पनि नगरेको बताएकी छन् ।
अमेरिकी विदेश मन्त्रालयकी प्रवक्ताले यसबाहेक अमेरिकी विदेशमन्त्री मार्को रुबियोले भारतीय विदेशमन्त्री एस. जयशंकर र पाकिस्तानी प्रधानमन्त्री शहबाज शरीफसँग फोनमा कुराकानी गरेको जानकारी दिइन् ।
